DIRECTOR sa Police Regional Office 7 nagtuo nga ang bag-ong liderato karon sa Kagamhanan sa Siyudad sa Sugbo mohatag og maayong relasyon sa kapulisan.
Ipadayon usab ang mga programa sa Philippine National Police (PNP) nga wa mapatuman ni Mayor Tomas Osmeña.
Mao kini ang napanglantawan ni Police Regional Office (PRO) 7 Director Debold Sinas sa pagdaug ni Mayor-elect Edgardo Labella ug Vice Mayor- elect Michael Rama.
Matod ni Sinas nga ilang nakita nga mobalik na ang maayong relasyon tali sa kapulisan ug sa Kagamhanan sa Dakbayan.
Sa pamunoan ni Osmeña, matod ni Police Brigadier Debold Sinas, kanunay dauton sa mayor ang mga pulis ug pasanginlan og mga dautan nga nahimo niini.
Sukad si Police Col. Royina Garma ang namunoan sa Cebu City Police Office (CCPO), ang kapulisan ug City Hall way maayong relasyon.
Usa sa labing uwahi nga away tali nila ni Osmeña ug kapulisan may kalabot sa nag-viral nga CCTV video diin tulo ka mga tawo ang gipangkulata.
Si Osmeña nipasangil nga ang naa sa video mao ang mga pulis sa Talamban Police Station.
Iyang kining gipanghinganlan sa iyang Facebook post, usa niini iyang gipasanginlan nga drug protector.
Sa wa pa kini mahitabo, ang mga pulis maoy iyang gipangdudahan nga nanghasi sa mga barangay kapitan sa mga bukirang dapit sa Dakbayan sa Sugbo nga iyang mga kaalyado.
Nagkakomprontase usab sila si Osmeña ug mga pulis sa usa ka checkpoint sa Barangay Panagdait nga nisangko sa pagkihaay.
Apan sa nagsingabot nga liderato sa City Hall, nagtuo si Sinas nga makatrabaho na nga kompyansa ang kapulisan ug makaani na og suporta gikan sa Siyudad sama sa gasolina, sakyanan ug uban pa.
“With the new leadership diha sa Cebu City, we expect siguro a good relationship now. We hope nga dili na antagonistic at dili na against gyud sa pulis. Kasi katong kaniadto nga administration, maorag wala na toy nakita kon dili mga dautan nga pulis lang,” matod ni Sinas.
Usa sa gitan-aw ni Sinas nga mahimong mahinayon nga programa mao ang bag-ong building sa Pardo Police Station nga tukoron sa Barangay Inayawan, Siyudad sa Sugbo.
Nalangay ang maong proyekto human ang kapitan sa maong barangay nibabag nga matukod sa usa ka luna tungod sa giingong makabalda sa trapiko.
Ang lakang ni Barangay Kapitan Kirk Bryan Repollo gisuportahan usab ni Osmena.
Nagtanyag ang barangay og laing luna nga duol gihapon sa barangay hall, apan ang liderato sa kapulisan wa makauyon.
“Some of the programs madayon na, talking particularly katong project nga police station sa Inayawan. Wala pa namo to gibalik ang kwarta sa taas. Nga karon bag-o na ang mayor, akong gipa-hold. Basin pwede pa implement,” dugang ni Sinas.
Sukad nga nilingkod sa katungdanan si Garma, matod ni Sinas, wa siya makadungog nga gidayeg kini sa outgoing nga mayor sa Siyudad sa Sugbo.
Ikiha si Osmeña
Sa tinguha karon ni Garma nga mopasakag libel batok kang Mayor Osmeña human gipasanginlan nga nagdawatan og P 1million nga payola sa illegal gambling matag semana, paluyohan kini ni Sinas.
Ipasaka usab karong adlawa ni Police Patrolman Romil Granada Gelogo, sakop sa Criminal Investigation and Detection Group 7, ang kasong carnapping batok sa mayor.
Usa sa mga opisyal sa CIDG 7 nga di lang magpahingalan nitug-an sa Superbalita Cebu nga di na ilakip ang pagpasakag kasong robbery sanglit dili man kini ma establisar.
Si Gelogo gidakop ni Osmeña sa dihang nigawas sa kampo sa Cebu City Police Office nga nagshorts ug naka tsinelas lang nga nagmaneho sa iyang motorsiklo.
Ang motorsiklo iyang gipa-impound. (AYB)