KAPULISAN, militar ug Commission on Elections (Comelec)- Central Visayas mihulagway sa election nga malinawon bisan sa pag palyar sa mga vote counting machines ug vote registration verification machine sa pipila ka mga polling precincts sa Central Visayas.
Sukad alas 9 Martes sa buntag, Mayo 14, duha lang ka kaso sa pagpamusil ang nahitabo sa Central Visayas Lunes sa kaadlawon, Mayo 13 ug niadtong Dominggo, Mayo 12, nga may kalabutan sa eleksyon.
Ang unang insidente nahitabo sa Siaton, Negros Oriental ug didto sa Lungsod sa Loay, Lalawigan sa Bohol.
Lakip sa nahitabo ang pagpanigbas sa managsuon sa Siyudad sa Mandaue, human maglalis tungod sa politika ug ang kaso sa pagpanagpa sa kandidato sa Dakbayan sa Bogo.
Nakatala ang Regional Election Monitoring Action Center og 131 ka personalidad nga nadakpan sa liquor ban sa 141 ka operations, diin tulo ka menor de edad ang ilang na rescue.
Dose ka kaso sa vote buying ang ilang nadawat nga reklamo diin duha niini sa Siyudad sa Sugbo, tulo sa probinsya sa Sugbo, duha sa Bohol, usa sa Negros ug tulo sa Siquijor samtang adunay usa ang ipaubos pa sa imbestigasyon.
Gipa imbestigaran pa usab sa Police Regional Office (PRO)-Central Visayas ang report labot sa pagransack sa dili momenos napulo ka armadong tawo ang barangay hall sa Apas diin gipang dapatan ang mga kawani niini.
Matod ni PRO- Central Visayas director Debold Sinas nga ilang gipasubay ang mga closed-circuit television camera sa dapit apan sa inisyal nga impormasyon, kwarta ang tuyo sa maong grupo nga giingong naa sa sulod sa barangay hall.
Moabot usab ngadto sa 214 ka makina sa pag botar ang nag-malfunction, 80 niini mao ang vote counting machine ug 134 ang vote registration verification machine.
Apan matod ni Police Brigadier General Debold Sinas nga wala kini maka balda sa pagbotar sa mga tawo ug wala usab silay gideklara nga failure of elections.
Giangkon ni abogado Veronico Petalcorin, ang acting director sa Comelec- Central Visayas, nga adunay mga balota nga alang sa Lungsod sa Alburquerque, Lalawigan sa Bohol ang naabot sa Lungsod sa Cordova.
Dali hinuon kini nilang naaksyonan ug napadala sa maong lungsod Lunes sa hapon aron magamit sa mga rehistradong mga botante.
Sugod alas 12:01 Martes sa tungang gabii, gilibkas na sa Comelec ug sa kapulisan ang liquor ban apan ang gun ban hangtod pa sa Hunyo 14. (AYB)