NITAMBAG karon ang Bureau of Fisheries and Aquatic Resources (BFAR) 7 sa publiko nga likayan lang una ang pagligo sa pipila ka dapit sa kadagatan sa Mactan human sa presensya sa dikya o jellyfish.
Mismo ang director sa BFAR 7 Alfeo Piloton nihulagway nga normal nga modaghan kini panahon sa ting-init.
“Yes, natural phenomenon kana siya. Usually summertime na sila mogawas. Ang gimonitor namo ang mga existing fish cages, kay naay experiences in the past nga apektado ilang fish stocks. So, naa na silay idea karon unsaon paghinlo ang ilang fish cages nga walay kadaut sa isda nila, by observing the water current direction.”
Ang pangu sa BFAR Provincial Fishery Office-Cebu Edgar Delfin nibutyag sa Superbalita Cebu nga wala pa hinuon sila’y nadawat nga report nga naapektohan niini.
Gipasabot ni Delfin nga tungod kay aduna’y hilo kining gaway sa dikya, maapektohan ang hasang sa isda kon anaa sa usa ka net o kaha sa fish cages kay dili na kini makalikay.
Hinuon kining mga dikya nga makit-an duol sa baybayon mao ang mga bata nga dikya o bag-ong gihimugso ug gidala sa bawod hinungdan nga anaa sagad sa kaligoanan sa publiko nga baybayon.
Tambag ni Delfin sa publiko nga likayan ang dapit nga anaay daghang dikya ingon man kon maigo ang panit niini daling kining butangan og suka o lana sa dili pa mobisita sa tambalanan.
Tulo ngadto sa upat ka semana bag-o managko ang maong mga dikya diin makalangoy na kini ngadto sa lawod.
Di lang ang Mactan ang nataho nila nga daghan niini, aduna’y pipila ka parte usab sa kadagatan sa Sugbo.
Sa buwan sa Hunyo o ang panahon sa ting-uwan ug tinghabagat mao usab ang pagpanghawa sa mga dikya sa baybayon.