SECTIONS
Tuesday, July 16, 2019
PAMPANGA

Garcia: Papandatilan ing Kapanaligan (Keep the Faith)

Kapisik

“AT DAKAL kareng matudtud king alikabuk ning yatu mangagising la,

ding aliwa king alang--anggang bye, at ding aliwa king kamarinayan

at alang-anggang kayalipustan.”

~Daniel 12:1–2

Yesus linawe na la at nganang migsalita, “King tau e malyari iti, dapot e king Dyos; ding sablang bage malyari la ngan king Dyos.”

~ Dyoswa, Dangka 1: Sunis 9

(Joshua 1:9)

“E wari tiburan dana kayu? Magpakasikan kayu at magpakatapang.

E kayu tatakut; e kayu paysira lub, uling ing Ginu a kekayung Dyos

ume ya kekayu nu kayu man munta.”

~Ding Ebreu, Dangka 12: Sunis 1-3

(Hebrews 12:1-3)

“Inya pin sana, makapalibutad tamu king metung a dakilang biga ring saksi, ibalugse tamu ing sablang sumbagal at ing salang saguli mung makagapus. At sana mulandit tamung ating kapagpilitan king ligligan a mitatakan para kekatamu, pakatingid ta la ring kekatamung mata kang Yesus, ing megumpisa at migpapantas king kapanaligan. Uling ing tula a mitulid Kaya apibata neing kurus,sasakwil na ing kamarinayan, at linukluk Ya king dane wanan ning tronu ning Dyos. Ituring me Ya a mibata king pamanyalang ibat karing makasalanan, bang e kayu magal at mangayna pusu. Mandatila kayu king pamagbante yu; talakad kayung matatag king kapanaligan; magi kayung matapang; magi kayung masikan.”

~Mumunang Korintyanu,, Dangka 16: Sunis 13

(1 Corinthians 16:13)~1 Corinthians 16:13

***

Kaybat mung tinaya king metung a pamanalakaran a para keka binang maulaga para, e mu keka, nung e para mu naman karing aliwang kapara mung lelangan, king Ginu—e masaguli ing e na ka kimut o magsalita mu man uling medakurak ka e mu pangatau nung e pati diwa.

Dakal lang kakilala, kakaluguran at akayabe agyang saguli mu ing piyabe mi a melungkut at mengayna pilubluban. Masakit tanggapan ing gagawan mu ngan ing sablang agyu yu para king ikakayap ding sabla dapot masambut ko pang alang kalaban-laban karing taung alang pamipaulaga kapurit man.

Ala na lang galang king patas a pamilaban. Daig de pa ing papatul keng anak a malati. Maragul na la pin gagamitan do pang sandata ring kalaban dang mangalati mu. Ken mung ininum dang danum malumud la reng kalaban da, ngara ping sasabi deng makatwa kanita. Ala lang nanu mang kikilalanang batas o tuntunan keti king yatu at agya man king batas ning Apung Ginu. E na la mangilabut o mandiri king pamandaptan da ring mamulang.

Makanyan man, nanung akarapat nung e namu tumiman king libutad da ring pusung mengaspak at diwang mengabangal. E ta sukat sumuku at paburen namung sakal-sakalan, sikad-sikaran at lura-luran ding salaulang babi ning makabayung panaun. Alang makayampat king panyatang ning sala nu man kakaba ing bengi.

E ta sukat duku king balu tamung masikampu. E ta sukat siklod king arapan ning lupang makapal pa keng dalan papunta Apalit magmula San Simun. E ta sukat paysaul karing kampung ning kelang kasalpantayanan, at lalung-lalu na--kelang-Dyos.

Atin pang abak kayari ning bengi. Atin pang pamamanlag ning aldo kaybat ning dalumdum ning mepisak a kapitangan bengi at ning manimutlang galingaldo. Atin pang sala king panyatang ning munag, abe.

***

Dake Talabaldugan:

1. gunggon/gunggun – (palagyu) kimut/pangimut, galo/pamigalo. English: movement, motion. Alimbawa king pamangamit: “Bagya namang pepakit nang gunggun para king balen kaybat nang mipuk Denung inya ngeni e da ne buri deng memalen.”

2. gupít¹ – (palagyu) pamanggupit, pamangatli, urud nung king bwak. English: cuttingor clipping with scissors. Alimbawa king pamangamit: “Ing gupit a gewa nang Mirung e na kalupa ning urud a gagawan nang Kandu uling e no man pareu penigaralan.”

3. gupít² – (palagyu) ing paralan ning urud/pamanurud king bwak. English: haircut, hairstyle or hairdo. Alimbawa king pamangamit: “Kayawig ne gupit Milyung i Goryu uling pane neng pagkyapusan ing amu na.”

4. gupít³ – (palagyu) tabas o pangatabas, putut o pangaputut. English: the way cloth is cut, usually with scissors. Alimbawa king pamangamit: “Manayun ya gupit ing imalan a gagawan nang takuku ning dalagang matwa inya maglupa yang anak pa.”

5. gupò/gupù – (palagyu) pangagupu, pangasira, pangalasak, pangabalbal, pangalaso. English: state or manner of being shattered, demolished. Alimbawa king pamangamit: “Bina la gupu ring awang ning pisamban inyang minayun inya migpasya ya ing pari a alilan no ngan ba’lang e makapanasakit kareng sisimba.”

***

GAWING MEKALINGWAN KARING KAPAMPANGAN!

Ing pamanulus at pamangabit bakting kareng bale kanitang minuna a kawayan at pinaud la pa reng tuknangan deeng kabalen tamu metung a gawing e na keraklan mibalik. Ngeni kasi pane na lang steel o bakal, cement at hollow blocks gawa reng bale o ding awsan dang concrete o kongkretung bale. Inya sa’t deng panibatan da keng pinaud o ding sasa at bulu pati na kwayan malagad nalang manese at lakwas na ing mitatanam. Sadya nung bulan ning Mayu o agyang Abril pamu manulus na la at mamakting deng sibabale anting pamiadya keng kauran a magdalang bagyuat albug. Kanita karatang ing Unyu e na kakarug keng nanu mang sigwa ing dating.

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph