AKONG ipadangat ang mainitong pagtimbaya sa tanang midaug nga senador, kongresista, gobernador, bise gobernador, board member, mayor, bise mayor, ug konsehal sa miaging Mayo 13 nga eleksyon.
Sa samang pagkaagi, akong ipadangat ang pahasubo sa tanang napildi nga kandidato.
Ug ning adlawa akong ipadangat ang pagtimbaya sa mga taga Davao nga sila kanhi Special Assistant to the President Christopher "Bong" Go ug kanhi PNP Chief Ronald "Bato" dela Rosa nga nakadawat og makabungog nga suporta sa katawhang Pilipino.
Ang ilang maayong binuhatan ug estratehiya sa kampanya maoy nagbutang kanila sa pwesto, busa naglaum kita nga ila kining suklian og maayong serbisyo.
Hinuon, suma pa ni Pangulong Rodrigo Duterte, wala silay laing bisyo kundi ang magseribyo sa mga Pilipino.
Estratehiya
Sa akong nakita, nindot ang estratehiya sa partido sa Pangulo mao nga naparot ang tanang kandidato sa oposisyon.
Ang administrasyon migamit og nagkadaiyang estratehiya aron mapadangat ang mensahe sa katawhan pinaagi sa mass media (radyo, telebisyon, ug mantalaan) ug social media diin minilyon ka mga suporters kanunay mangaway sa kontra sa ilang kandidato.
Gawas pa niini, gipakusog nila ang paglihok sa matag komunidad diin makuha nila ang daghang boto.
Kasinatian sa kampanya
Base sa akong kasinatian sulod sa upat ka mga eleksyon nga apil ako sa campaign team gikan 2001 hangtud 2010, aron modaug ang politiko kinahanglan makamao mogamit og legal ug ilegal nga estratehiya sa kampanya.
Ang legal mao ang pagpanglamano, pagdiskurso sa entablado, pagtambong sa kasal, bunyag, lubong, pista ug uban pang kasikas sa bisan asa.
Ang ilegal mao ang pagpanghatag og bugas, odong ug tinapa nga dunay pakapin kwarta apil na ang pagpanghasi ug black propaganda.
Sa propaganda, kung balik-balikon sa makadaghan ang bakak nga akusasyon, motuo gayud ang tawo.
Mao gayud kini ang reyalidad sa eleksyon diin di modaug ang may pagkabuotan ug relihiyoso nga kandidato.
Hinuon, mapasigarbuhon ako nga among kandidato kaniadto di mosugot sa ilegal nga pangampanya.
Sanglit ang mayorya nagdesisyon na, sa mga napildi, suportahi ninyo ang mga bag-ong motimon sa renda sa gobyerno kay mao kini ang esensya sa demokrasya pinaagi sa pagtugyan sa atong gahum ngadto sa mga napiling kandidato.