DIGOS CITY -- "All in one in Davao del Sur."
Kini maoy nakita sa mga tigpaniid human gi-dominar pagbalik sa pamilyang Cagas ang siyudad ug probinsiya human ang 2019 midterm elections.
Anaa pa lamang sa 84.6 percent ang naihap nga certificate of canvass sa Commission on Elections (Comelec) office sa probinsiya, apan nakita na ang kadaugan ni incumbent Governor Douglas Cagas, kinsa nakakuha og 156,707 boto batok sa manok sa partidong Hugpong ng Pagbabago (HNP) nga si Atty. Joseph Peñas, last-termer nga mayor sa dakbayan.
Si vice gubernatorial aspirant Marc Douglas Cagas IV, anak sa gobernador, nag-una sa botong 137,950 batok ni incumbent Vice Governor Aileen Almendras nga anaa pa sa 103,604 ang boto.
Samtang sa congressional race, si HNP candidate Juanito Morales nakakuha lang og botong 69,190 batok kang re-electionist Representative Mercedez Cagas, asawa sa gobernador, nga dunay 151,180 boto.
Ang pag-umangkon ni Douglas, Josef Cagas, nag-una na sa mayoralty race sa botong 41,260 batok sa duha ka kandidato sa HNP.
Si Johari Baña, bana sa pag-umangkon ni Cagas, labaw na sa vice mayoral race sa botong 28,770.
Ang igsuon sa gobernador nga si incumbent councilor Gary Cagas mao ang nag-una sa Sangguniang Panlungsod sa botong 33,847.
Sa Unang Distrito sa Davao del Sur, nag-una sab si John Tracy Cagas, ig-agaw sa gobernador, human nagpasubli isip bokal sa botong 40,272. (Orlando B. Dinoy)