Mayorya sa mga kandidato sa HNP sa Davao del Sur naparot

DIGOS CITY -- Nangaparot ang mayorya sa mga lokal nga kandidato sa Hugpong ng Pagbabago (HNP) ni founding chair ug Davao City Mayor Sara Duterte-Carpio sa probinsiya sa Davao del Sur.

Sa official partial results sa certificate of canvass, nasuta nga pipila ka mga incumbent mayoralty candidates ang wa makalusot.

Sa Bansalan, si acting Mayor Edwin Reyes naparot sa boto nga 14,458 batok sa gisuspende nga mayor nga si Mayor Quirina Sarte nga adunay botong 17,599.

Sa Hagonoy, nilukapa si incumbent HNP Mayor Conrado Laza, batok ni incumbent Vice Mayor Franco Calida sa botong 11,843 ug 12,872.

Sa Sta. Cruz, wa sab makalusot si HNP mayoralty candidate Joel Ray Lopez sa botong 12,679 batok sa independente nga si Jaime Lao Jr., nga nag-una sa botong 14,491 ug laing HNP candidate nga si Dongkoy Almendras-5,741.

Sa Matanao, wa makatarog si HNP candidate Rose Jumawan nga nakakuha sa botong 5,527 batok kang incumbent Mayor Vincent Fernandez nga anaa na sa 16,119 ka boto.

Bisan sa Malalag, wa mosaler si HNP candidate Roel Paras nga aduna lamay 4,819 ka boto batok ni incumbent Mayor Peter Valentin nga 9,621.

Sa siyudad sa Digos, pulos naparot ang duha ka mga kandidato sa HNP nga sila si Nonito Llanos III nga anaa sa 14,963 ang boto ug incumbent Vice Mayor Rey Hermosisima -- 12,129 batok sa independent candidate nga si Josef Cagas nga anaa na sa 41,260 boto.

Samtang seguradong daug na ang mga mayor sa lungsod sa Magsaysay ug Sulop human way kalaban si Mayor Arthur Davin ug Atty. Jose Jimmy Sagarino.

Sa tanang kandidato sa HNP pagka-mayor, duha lamang ka mayor ang hayag na ang kadaugan.

Nanguna na sa ihap si Kiblawan re-electionist Mayor Carl Jason Rama sa botong 11,142 batok kang Bokal Marivic Caminero nga dunay 7,227.

Apil sab si Padada HNP Mayor Pedro Caminero nga nakakuha og 7,126 batok kang Gladys Razonable-6308.

Sayo niini, si Presidente Rodrigo Duterte miuyon nga ang resulta sa 2019 midterm elections usa ka referendum sa iyang administrasyon.

Mga political analyst sa Davao del Sur nagbutyag nga lisod sab makuha ni Mayor Sara ang suporta sa Davao del Sur kon modagan kining presidente sa nasud sa 2022 human wa makaporma ang HNP sa probinsiya. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph