Joseph Peñas nidawat na nga pildi

DIGOS CITY -- Gipahibawo sa kampo ni gubernatorial aspirant ug last-termer Mayor Joseph Peñas nga gidawat na niini ang iyang kapildihan batok kang incumbent Governor Douglas Cagas.

Sa labaw ni Cagas nga kapin 60 mil boto, wa na maglaum si Peñas nga maangkon ang kadaugan bisan anaa pa sa 84.6 porsiyento ang naihap nga certificate of canvass.

Si Cagas nakakuha og boto nga 156,707 batok ni Peñas nga anaa pa sa 97,708.

Ang anak aa mayor nga si Josef Bernard Leo Peñas nagbutyag nga magpabilin ang legasiya sa iyang amahan ug di makalimtan sa katawhan.

"A person who I look up to since Day 1 of the campaign period. It is now time to retire and live a private and peaceful life," asoy niini.

"People of Digos City and Davao del Sur who supports my father through thick and thin, thank you so much. Some ending tends to give us a new beginnings," dason niini.

Apan di makatoo ang ubang supporters ni Peñas nga mapildi ang ilang kandidato sama kang Elena, 51, nga taga Barangay Tres de Mayo, sanglit kini ang unang higayon nga natagak ang political career sa mayor.

Sa 2013 elections, si Peñas maoy nakapildi kang Cagas human sila nag-atbang pagka-mayor sa siyudad. Ug lain pang duha ka kabanay ni Cagas ang gipildi ni Peñas atol sa 2010 ug 2016 elections sa mayoralty race.

Siyam ka tuig sab siya nga naglingkod isip bise mayor sa dakbayan sukad 2001 hangtud 2010.

Human niini, nahimo siyang mayor sa dakbayan niadtong 2010 ug matapos ang tulo ka termino niini sa Hunyo 30 ning tuiga.

Si Bernard mitunol sa ilang dakong pasalamat sa tanang misuporta sa kandidatura sa ilang amahan.

"This is a tragic defeat but we will accept it. A new chapter in our lives will be opened. Good luck and God bless Digos City and the province of Davao del Sur," ni Bernard sa iyang social media post. (Orlando B. Dinoy)