GIHAROS sa mga kandidato sa Partido Demokratiko Pilipino-Lakas ng Bayan (PDP-Laban) ang mga posisyon sa natigayong eleksyon sa gikonsiderang init ang hisgutanan sa politika didto sa Davao del Norte, diin nailisdan na ang dul-an upat ka dekada nga pagdominar sa mga iladong bansagon niadto.
Sukad sa pagsuwat ning balita kagahapon sa hapon, Mayo 13, wala pa nadeklara ang mga kandidato nga dunay taas og boto sa Davao del Norte.
Sa partial unofficial tally sa Commission on Elections (Comelec), ang gikontrobersiya nga si kanhi House Speaker Pantaleon Alvarez mikuha'g 163,977 votes batok sa kaatbang niini nga si Anthony del Rosario nga duna lamang 68,193 votes alang sa first district sa probinsya.
Sa second district, gipapha sab ni Aldu Dujali nga dunay 125,170 votes ang ilado nga magpapatigayon nga si Antonio "Tonyboy" Floirendo Jr., nga dunay 92,679 votes lamang diha sa pagka-congressman.
Sa pagka-gobernador sa probinsya, di mabangbang ug imposible nga maapsan pa si Kuya Edwin Jubahib, ang nailhang tigpanalipod sa mga kabus nga mikuha og 279,222 votes batok sa kaatbang niini nga si Rodolfo del Rosario Jr., nga duna lamang 169,363 votes.
Sa pagka-bise gobernador, nanguna si Rey Uy, nga dunay 268,264 votes, batok kang Raymond Joey Millan nga duna lamang 140,151 votes.
Ang maong tally gikan sa alas 2:50 sa hapon kagahapon, Mayo 14, nga 99.59 percent nga election returns transmitted diha sa 741 ngadto sa 744 ka mga clustered precincts.
"Ang akong kadaugan, kadaugan sa katawhan sa Davao del Norte, labi na sa hut-ong sa mga kabus. Ako nagpasalamat sa taga DavNor sa ilang pagmahal sa probinsya, ang akong saad adtong kampanya, akong saad akong tumanon para maangkon na sa katawhan ang dugay na nilang gipangandoy nga serbisyo sa Davao del Norte. Utang kabubut-on nako sa katawhan nga dili nako makalimtan," gipadala nga mensahe ni newly-elected Davao del Norte Governor Edwin Jubahib sa SuperBalita Davao kagahapon.
Igacos
Nanguna gayod si Al David Uy nga pambato sa PDP-Laban nga dunay 40,192 votes batok kang Orly Amit sa Hugpong ng Pagbabago (HNP) nga dunay boto nga 14,920 sa pagka-Mayor sa Island Garden City of Samal (Igacos).
Tagum City
Midaug sab ang pambato sa PDP-Laban nga si Allan Rellon pagka-mayor sa siyudad nga dunay boto nga 91,368 batok sa kaatbang niini nga si Geterito Gementiza nga duna lamang 20,889 votes.
Pagka-bise mayor, midaug si Eva Estabillo nga taga PDP-Laban sab nga dunay boto nga 77,790, samtang ang kaatbang nga si Engr. Jun Coquilla duna lamang 28,083 votes.
Compostela Valley
Wala hinuoy miatbang kang Jayvee Tyron Uy sa pagka-governor ug sa pagka-bise gobernador Maricar Zamora nga pulos anaa sa partido sa HNP.
Sa pagka-congressman sa unang distrito, nanguna si Way Kurat Zamora sa HNP nga dunay boto nga 61,120 gikan alas 2:50 sa hapon nga updated tally kagahapon, samtang si Franco Tito anaa sa 58,953 votes. Sa ikaduhang distrito, walay miatbang kang Ruwel Peter Gonzaga nga gikan sa PDP-Laban.
Sa kinatibuk-an, nahilom una ang linabayay og isyu sa mga politiko sa Davao del Norte human migawas ang resulta, apan gituohan nga posible na sab kini nga moulbo agi'g pagtubag sa kampo ni Alvarez sa limpyo ug legal nga pamaagi sa mga isyu nga gilabay kanila sa kaatbang.