MILUGAK na ang Rain or Shine Elasto Painters ug nakadesisyon na kining i-trade ang usa sa ilang mga haligi nga si Ramond Almazan ngadto sa Meralco Bolts.
Ang mga tag-iya sa Elasto Painters nga sila si Raymond Yu ug Terry Que mingsugot nga buhian ang kanhi sakop sa Gilas Pilipinas baylo sa duha ka first-round picks sa umaabot.
“Ang kapalit is yung first-rounder sa next draft at yung sa one draft after. So it’s two first-rounders in the next three years. Pero depende pa rin sa approval yun,” matod pa sa usa ka tinubdan sa interbyu sa Spin.ph.
Ang mga dokumento alang ning maong panagbaylo gisumiter na sa Office of the Commissioner sa Philippine Basketball Association (PBA) ug naghuwat na lang kini nga maaprubahan.
Ang Rain or Shine mipili kang Almazan isip third overall sa 2013 PBA Rookie Draft sunod nila ni Greg Slaughter ug Ian Sangalang ug nagbaid kini ubos sa paggiya ni coach Yeng Guiao dihang nagtrabaho pa si Guiao sa team.
Sa iyang pagduwa sa Elasto Painters, si Almazan kaduha napiling All-Star ug nakaduwa sab kini sa national team sulod sa pipila ka mga higayon.
Hinuon, adunay nahitabong panagbikil ni Almazan ug sa kasamtangang coach sa Elasto Painters nga si Caloy Garcia nga tatawng nakaapekto sa kampanya sa team.
Sa Philippine Cup, si Almazan sulod ra sa unom ka mga duwa nakapakita og aksyon diin nag-average kini og 8.0 puntos. (ESL)