Adlaw na's paghukom!

Duwa karon

6:00 pm- UV batok USC (Game 5)

Game 1: USC 76, UV 70

Game 2: UV 70, USC 63

Game 3: USC 87, UV 76

Game 4: UV 60, USC 52

WALA na’y laing ugma. Wala na’y laing pagsidlak sa adlaw. Adlaw na sa paghukom alang sa 10-time champions University of the Visayas (UV) Green Lan­cers ug University of San Carlos (USC) Warriors.

Ang duha ka mga kampo mag­sang­ka og balik sugod karong alas 6:00 sa gabii alang sa deciding Game 5 sa Cebu Schools Athletic Foundation Inc. (CESAFI) basketball college division finals series sa Cebu Coliseum.

Sa nag-unang upat ka mga duwa, nagginabsanay ang duha ka mga kampo.

Ningdaog ang Warriors sa Game 1, 76-70, ningbawos ang Green Lancers sa Game 2, 70-63, ninglampos na sab ang Warriors sa Game 3, 87-76, unya ningbawos na sab ang Green Lancers sa Game 4, 60-52.

Apan giangkon ni Warriors coach Britt Reroma nga naa sa Green Lancers ang momentum sa series.

“Naa gyud sa UV ang momentum kay ningdaog man sila sa last game. But I think, kon kinsa ang mas ganahan nga modaog ning duwaa mao gyu’y mo-champion,” matod ni Reroma.

“Kami ba kaha nga dugay na ka­ayong wala ma-champion o ang UV nga nagsige na lang og champion? Wa gyud ta kahibalo, depende ra gyud sa execution sa players.”

Ang Warriors katapusang ningkam­piyon sa collegiate basketball sa Sugbo niadto pang 1958 sa nabungkag nga Cebu Amateur Athletic Association (CAAA).

Aduna’y punto ang giasoy ni Re­roma nga wala kanila ang momen­tum sa series ug tataw nga mao sab kini ang gibati sa Green Lancers.

“Ready nami. Taas kaayo ang morale sa akong players. Kondisyon kaayo ang akong players pero it’s still anybody’s game. Kami nagpasalamat lang mi nga nakaabot pa mi og Game 5,” matod ni Green Lancers coach Gary Cortes.

Ning kombatiha, adunay laing hi­nagiban ang Green Lancers nga dili man tuod nila pisikal nga magamit sulod sa korte apan ila kining magamit sa ilang panghunahuna ug pagpalig-on sa dughan.

Ang mga bata sa Children’s Re­source Center Parian Drop-in Center manan-aw og balik ning duwaa aron paghatag og moral nga suporta sa Green Lancers.

Sa Game 4 niadtong Sabado, ang maong mga bata ningtan-aw sa duwa ug giangkon ni Cortes nga naka­hatag kanila og dugang kadasig ang presensya sa mga bata sa Parian Drop-in Center.

“Naka-boost gyud sa among mo­rale ang presence sa mga bata atong Game 4,” asoy ni Cortes.

Ang Parian Drop-in Center maoy usa sa tulo ka mga insti­tusyon nga gibisita sa Green Lancers isip tipik sa ilang ka­ti­lingbanong responsibilidad. Ang Green Lancers ningduaw sab sa House of Hope Drug Reha­bilitation Center ug Missionaries of Charity Gasa Sa Gugma.

Gipasabot ni Green Lan­cers assistant coach Van Ha­len Parmis nga interesado sab untang motan-aw sa duwa ang mga madre sa Missionaries of Charity Gasa sa Gugma apan dili lang kini puwede.

“Ang amo na lang himuon kay magbutang mi og projector para isalida ang live streaming sa Sun.Star sa widescreen para makatan-aw ang mga madre,” matod ni Par­mis.

Nidugang si Parmis nga ang tigsuporta sa Green Lancers sa out-of-town games niini nga si Gomer “Enan” Sabio motan-aw sab sa duwa aron mohatag og moral nga suporta.

Si Sabio, kinsa mitan-aw sab sa Game 4, mobiyahe pagbalik gikan sa iyang pinuy-anan sa Tagoloan, Misamis Oriental paingon dinhi sa Sugbo aron motan-aw sa deciding game sa series.