LEYTE--Walo ka armadong mga lalake nasikop sa kasundalohan ug kapulisan sa Barangay Belen ning lungsod alas 11:30 sa gabii, Lunes, Mayo 13, 2019.
Giila usab awtoridad ang mga suspek nga sila si Efren Pilo, taga Gen. San; Abdul Fatah, taga Taytay Rizal; Danilo Camello, taga Quezon City; Rustom Pastrana, taga Taguig City; Cris Daclitan, taga Leyte Leyte; Saloy Sarduan, taga Nueva Ecija; Sheronito Cuevas, taga Nueva Ecija ug Danilo Baderas taga Gen. San.
Gipahapa sa mga awtoridad ang mga suspek ug gipangdala sa Police Station aron sa imbestigasyon.
Matod sa report sa Police Regional Office (PRO) 8, ang grupo sa kasundalohan sa 802nd Brigade pinangulohan ni Corporal Joel Docos uban sa kapulisan sa Leyte, Leyte pinangulohan ni Police Captain Ruben Recilla naka-standby sa maong dapit.
Ilang nabantayan nga dunay duha ka mga sakyanan nga ninghunong sa tunga sa karsada.
Sa pagsusi ni Docos, usa kini ka green nga Starex van (ABA 6617) nga dunay tulo ka mga sakay samtang ang usa Nissan van nga way plaka.
Pangutan-on unta sa kasundalohan ang mga sakay kon unsay tuyo sa ilang paghunong.
Atol sa pagsusi, nakit-an ni Docos ang pasahero sa atubangan sa Starex nga dunay armas sa kilid hinungdan nga ilang gipanaog ang mga sakay niini, lakip na sa Nissan.
Didto, nasakmit sa kapulisan ang upat ka kalibre .45 nga pistola; unom ka mga magazine ug 38 ka mga bala; usa ka KG 9 submachine pistol nga dunay duha ka mga magazine ug 34 ka mga bala.
Duna usay cash nga P11,360.00; 10 ka cellular phones; walo ka sling bags ug duha ka backpacks.