SA BAG-OHAY lang natapos nga piniliay niadtong Lunes, Mayo 13, may mga pamilya nga nagpabilin sa gahom ug nagmadaugon, apan may mga nangapilde usab sa laing mga miyembro sa mga banay.
Apil sa mga pamilya nga nagmadaugon sa lalawigan mao ang mga Garcia, Gullas, Ouano, Chiong, Apura, Reluya, Durano, Martinezes ug uban pa.
Apan sa miaging piniliay napakyas si incumbent 5th District Cong. Ramon “Red” Durano VI sa pagpasubli sa iyang position human gipildi ni kanhi Lilo-an mayor ug kanhi commissioner Cebu Port Authority Vincent Franco “Duke” Frasco, umagad nga lalake ni Cong. ug incoming Governor Gwendolyn Garcia.
Napilde usab si kanhi Bogo City mayor Celestino “Junie” Martinez Jr. nga nidagan sa pagka kongresista sa ikaupat nga distrito batok sa asawa ni incumbent Cong. Benhur Salimbangon nga si Janice.
Sa 1st district, nagmadaugon ang mag-apohan sa siyudad sa Talisay. Si incumbent Cong. Gerald Anthony “Samsam” Gullas nidaog pagkamayor samtang ang iyang apohan nga si incumbent Mayor Eduardo Gullas sa pagka kongresista.
Sa lungsod sa San Fernando, ang inahan ug anak nga managpares ang nidaog, sila si Mayor Lakambini Reluya nga nasublian sa pwesto ug Ricci Reluya sa pagka bise mayor, nga ni-substitute sa iyang amahan nga gibanhigan-patay nga si Ricardo “Nonoy” Reluya Jr.
Sa siyudad sa Naga, nilampos ang amahan ug anak nga sila si incoming mayor Valdemar Chiong ug incumbent Mayor Kristine Chiong sa pagka bise mayor.
Sa siyudad sa Carcar, ang magtiayon nga sila si incumbent Mayor Nicepuro Apura sa pagka bise mayor samtang ang iyang asawa nga si ex-officio Councilor ug presidente sa Association of Barangay Councils Mercedita Apura sa pagka mayor.
Sa lungsod sa Sibonga, ang magtiayon nga si Lionel Bacaltos sa pagka mayor ug iyang asawa nga si incumbent Mayor Caroline Bacaltos sa pagka konsehal.
Sa ikaduhang distrito, sa lungsod sa Samboan ang mag-amahan nga sila si incumbent Mayor Emerito Calderon Sr. nga nasublian sa pwesto ingon man ang iyang anak nga si Emerito Jr. Ang laing anak ug incumbent Cong. Peter John Calderon, nipildi ni kanhi Dumanjug Mayor Nelson Garcia.
Sa ikatulong distrito sa lungsod sa Tuburan nagbayloay ang magsuon nga sila si incumbent Mayor Democrito “Aljun” Diamante ug Bise Mayor Danilo Diamante.
Sa lungsod sa Aloguinsan ang magsuon nga sila si incumbent Cesare Ignatius Moreno ug Bise Mayor Raisa Moreno nga pulos nasublian sa pwesto.
Sa lungsod sa Balamban, si incumbent Provincial Board Member Alex Binghay way kontra sa pagkamayor ug ang iyang anak nga si Alfie Binghay midaog sa pagka bise mayor.
Sa lungsod sa Barili, nasublian si Mayor Marlon Garcia. Nidaog usab ang iyang manghod nga si kanhi kongresista Pablo John Garcia sa pagka kongresista sa ikatulong distrito.
Sa ikaupat nga distrito sa lungsod sa Tabuelan nagbayloay ang magsuon nga sila si incumbent Vice Mayor Raul Gerona sa pagka mayor ug incumbent Mayor Rex Gerona sa pagka bise mayor.
Sa lungsod sa Daanbantayan, si incumbent PB Member Sun Shimura nidaog sa pagka mayor. Ang iyang asawa nga si Kerrie Shimura sa pagka PB member.
Sa siyudad sa Bogo, ang magsuon nga sila si incumbent Mayor Carlo Martinez ug Bise Mayor Mayel Martinez pulos nasublian sa mga pwesto.
Sa lungsod sa Madridejos, nagbinayloay ang mag-amahan nga sila si Mayor Jay River Dela Fuente sa pagka bise mayor ug incumbent Bise Mayor Salvador Dela Fuente sa pagka mayor.
Sa ikalimang distrito sa lungsod sa Lilo-an, si incumbent Mayor Christina Garcia-Frasco nasublian sa pwesto. Iyang bana nga si Duke maoy nidaog sa pagka kongresista sa samang distrito.
Sa lungsod sa Compostela, si ABC president ug ex-officio Froilan Quiño nidaog pagka mayor samtang nasublian sa pwesto ang iyang uyoan nga si incumbent Konsehal Felijur Quiño.
Sa siyudad sa Danao, pulos nasublian sa pwesto ang mag-amahan nga sila si incumbent Mayor Ramon “Nito” Durano III ug Bise Mayor Thomas Mark “Mix” Durano.
Sa lungsod sa Sogod, nagbayloay og pwesto ang magtiayon nga sila si incumbent Mayor Lissa Marie “Moonyen” Durano-Streegan ug Bise Mayor Richard Streegan.
Sa lungsod sa San Francisco, nagbayloay sa mga pwesto sila sila si incumbent Mayor Aly Arquillano sa pagka bise mayor ug incumbent Bise Mayor Alfredo “Al” Arquillano Jr. sa pagka mayor.
Sa lungsod sa Poro, si incumbent Mayor Luciano Rama Jr. sa pagka bise mayor ug ang pag-umangkon nga si Edgar Rama sa pagka mayor.
Sa ikaunom nga distrito, sa lungsod sa Consolacion, pulos way mga kontra ang mag-inahan nga sila si incumbent Mayor Teresa Alegado sa pagka bise mayor ug incumbent Konsehal Joannes Alegado sa pagka mayor.
Sa lungsod sa Cordova, nidaog usab si incumbent Mayor Mary Therese Sitoy-Cho nga nasublian sa pwesto ug ig-agaw nga si Ximgil Dino Sitoy sa pagka bise mayor.
Sa siyudad sa Mandaue, nagmadaugon usab ang magsuong Ouano.
Nasublian si incumbent PB Member Thadeo Jovito “Jonkie” Ouano. Ang iyang mga maguwang nga sila si Emmarie “Lolypop” Ouano-Dizon nidaog pagka kongresista sa samang distrito samtang pagka konsehal sa Consolacion si Alfie Ouano.
Sa ikapitong distrito, sa lungsod sa lungsod sa Dumanjug, nasublian pagkamayor si Efren Guntrano “Gungun” Gica. Ang iyang igsuon nga si Efren maoy iyang bise mayor.
Sa lungsod sa Malabuyoc, pulos nasublian ang mag-amahan nga sila si incumbent Mayor Lito Creus ug Bise Mayor Lito Narciso III.
Sa lungsod sa Alegria, ang magtiayon usab nga Magallon ang nagmadaugon. Nasublian sa pwesto si Mayor Verna Magallon samtang iyang bana nga si Gilberto Magallon maoy nidaog pagka bise mayor.
Sa kinatibuk-an, moabot ngadto sa 25 ka local government units (LGU) dinhi sa Sugbo kansang renda sa pangagamhanan pagadumalahon sa mga kapamilya o mga igsuon, inahan, anak o may paryente sa pulitika. (SCG)