GITUDLO si Cebu Auxiliary Bishop Dennis Villarojo ni Pope Francis para modala sa diosesis sa Malolos sa Bulacan.
Mao kini ang anunsyo ni Cebu Archbishop Jose Palma sa usa ka press conference sa Martes sa hapon, Mayo 14.
Gikompirmar ni Palma nga ang appointment ni Villarojo gipahibawo sa Santo Papa sa usa ka pulong-pulong sa Vatican City sa Roma pagbuntag
sa Martes.
“Malolos has been longing for a bishop and the choice of Bishop Dennis is certainly a discernment that the nuncio has made,” sigon ni Palma.
Pero gibutyag ni Palma nga maghuwat pa sad sila og anunsyo gikan sa Roma kon kinsa ang mohulip kang ni Villarojo ug ni kanhi Auxiliary Bishop Oscar Florencio human sila gitudlo og bag-ong mga posisyon sa Simbahan Katoliko.
Sa miaging buwan, si Florencio gitudlo isip bag-ong obispo sa Military Ordinariate sa tibuok nasud human namatay si Bishop Leopoldo Tumulak sa edad nga 72 anyos niadtong 2017.
Sa iyang bahin, nagpasalamat si Villarojo kang Palma ug sa kaparian sa Sugbo sa ilang suporta sa iyang bag-ong hagit sa iyang pangalagad sa simbahan.
“Ako lang ipaambit akong pasalamat sa Ginuo sa kining bag-ong assignment nga iyang gihatag kanako. Nagpasalamat sad ko sa tanan, ilabi na sa mga kaparian sa Sugbo, ug sa atong mahal nga Arsobispo sa ilang kanunayng pagsuporta. Ug sa ilang pakig-uban kanako isip ilang igsuon sa presbyterium sa Sugbo,” sigon ni Villarojo.
Si Villarojo ang ika-limang obispo nga modala sa Diocese of Malolos sukad natukod kini niadtong 1962.
Ang 52-anyos nga obispo natawo sa siyudad sa Sugbo niadto Abril 18, 1967.
Pormal nga nagsugod og pangalagad si Villarojo sa simbahan human kini naordinahe niadto Hunyo 10, 1994.
Sukad sa 1994 hangtud 1998, nagtrabaho si Villarojo isip personal secretary sa nipanaw na nga si kanhi Cebu Archbishop Ricardo Cardinal
Vidal.
Gawas sa iyang trabaho isip personal secretary ni Vidal, nagtrabaho sad si Villarojo isip coordinator sa Pastoral Planning Board sa
Archdiocese of Cebu sukad niadtong tuig 2010.
Sa maong tuig, gitudlo siya ni Vidal isip head sa team of pastors sa Our Lady of the Sacred Heart Parish sa Barangay Capitol Site, siyudad sa Sugbo.
Padayon nga nagkupot isip team moderator sa Capitol parish bisag gitudlo na siya isip Auxiliary Bishop niadtong 2015.
Instrumental sad si Villarojo sa pag-organisar sa 51st International Eucharistic Congress nga gipahigayon sa Sugbo niadtong tuig 2016 isip
secretary-general sa organizing committee.