TIKLO ang upat ka mga indibidwal human nasikop tungod sa kalapasan sa balaod diha sa eleksyon ilabi na kining liquor ban sulod sa 48 ka oras o duha ka adlaw sa siyudad sa Cagayan de Oro.
Naila ang mga dinakpan nga sila si William Ong, 32, minyo ug Justin Abrio, 28, minyo nga taga Bacahan, Tambo, Macasandig sa siyudad diin nasikop niadtong alas 5:20 Dominggo sa hapon, Mayo 12, sa may lower Tambo, Macasandig ning siyudad.
Samtang nasikop usab mismo sa adlaw nga eleksyon sila si Keny Momongan, 19, ulitawo nga taga Barangay Nazareth ning siyudad ug Vergel Pontillas, 27, nga taga Camaman-an ning siyudad human nasapon kini nga nag-inom mga alas 2:40 sa kaadlawon sa may dalan sa Bolonsori.
Gibutyag ni Police Colonel Nelson Aganon, City Director sa Cagayan de Oro Police Office, nga upat ang nasikop nga nakasupak sa balaod sa eleksyon.
“Sa liquor ban may nahuli tayo kagabi na apat dito sa station 9, yung isa naman sa gun ban sa station 6, lasing eh,” matud ni Aganon.
Gitakdang pasakaan og kaso ang maong mga dinakpan.