GIDOMINAR ni Misamis Oriental Governor Bambi Emano ang kinatibuk-ang boto sa probinsya sa Misamis Oriental.
Si Emano kinsa nakakuha og partial pa lamang nga boto nga moabot ngadto sa 245,207 batok sa iyang kaatbang nga si abogado Julio Uy nga mokabat sa 194, 608.
Wala gipalad si Board Member Prexy Elipe sa pagka bise-gobernador ug ang giila niining higala nga si Jigjag Pelaez ubos sa National Unity Party maoy milabaw sa pagka bise-gobernador nga nakaangkon og boto nga 208,699 nga boto.
Sa pagkaboard member sa una ug ikaduhang distrito sa Misamis Oriental ang slate sa partido PaDayon Pilipino maoy nangharos.
Sa unang distrito gipanguhan nila ni Win Militante, Jerry Khu nga gikan sa United National Alliance ug independente, Erik Khu, Bebing Dumadag, ug Enteng Pelaez.
Sa ikaduhang distrito nag-una sa Saysay Emano, Nancy Madjos, Jessa Mugot nga mao lamang nag-inusarang sakop sa National Unity Party nga misulod gisundan dayon ni Boboy Sabal ug Dexter Yasay.
Sa pagkakongresista sa unang distrito naangkon ni Christian Unabia ang kadaogan batok ni kasamtangan bise-gobernador nga mao si Joey Pelaez.
Sa ikaduhang distrito dako kaayo ang labaw ug nagpabilin sa pagkakongresista si Juliette Uy batok kang Benjo Benaldo.
Si Benaldo nagpasalamat na sa iyang Facebook account sa tanang mitabang, miduyog ug misuporta sa iyang kandidatora ug malaumon nga unta daw ang iyang gipakigbisogan nga mga programa ug proyekto maoy himoun sa iyang midaog nga kaatbang.
“I will always be here and will always help in whatever ways I can para sa inyoha ug para sa Misamis Oriental. And it is my hope that the elected leaders will dedicate themselves to the projects and principles I fought so hard for,” matud ni Benaldo.
Ang Provincial Commission on Elections pinaagi ni abogado Aleli Ramirez nisulti nga adunay problema sa pipila ka mga SD card hinungdan adunay pagkalangan sa transmission sa walo ka lungsod apan aduna nay resulta niini sa matag munisipyo hinungdan nasayran na kung kinsa ang mananaog niini.
Kumpletuhon lamang nila ang transmission sa tanang lungsod usa modeklarar sa hingpit nga mga mananaog.