GISAAD ni Cotabato City native boxer Romero “Ruthless/Bangis” Duno nga iyang ipanimalos si Gesta dihang ikaharong niini ang Mexicanong si Juan Antonio “Zurdo El Mozo” Rodriguez ugmang adlawa didto sa Fantasy Springs Resort & Casino, Indio, California, USA.
Si Duno nga sakop sa Golden Boy Promotions (GBP) ug Sanman Promotions ug ubos sa pag-amuma ni former world champion ug karon US-based trainer Rodel “Batang Mandaue” Mayol makigsinukliay sa kumo ni Rodriguez sa 10-round main event fight alang sa WBO NABO Lightweight (135-lb) championship.
Ang beteranong 31-anyos nga Rodriguez (30-7, 26KO) mi-knocked out sa ikawalo nga hugna ni two-time world title challenger ug Mandauehanon “No Mercy” Mercito Gesta niadtong Marso 21 ning tuiga sa Hollywood, California.
Si Duno, 23, (19-1, 15KO) kasamtangang WBA Asia Lightweight King, nagpanikad na nga ikaharong si Rodriguez aron ipatagamtam ang panimalos ug matuman ang iyang damgo nga ang sunod ikaharong si Lightweight prospect Ryan “King Flash” Garcia.
“Mao na ang gusto ni Duno, revenge aron makabawos si Mercito kang Rodriguez. Nindot, kuyaw ug kulbahinam ni nga away kay beterano kaayo ang kontra,” matod ni Mayol sa chat online sa Superbalita Cebu. (Daniel Quindao Guden, US Correspondent)