DAGHAN sa mga rehistradong mga botante ang wala nakabotar atol sa adlaw sa eleksyon niadtong Lunes, Mayo 13, diin usa sa mga rason mao ang langan nga proseso ug ang uban ang wala na makapaabot ug nanguli na.
Dunay 345,358 ang rehistradong botante sa siyudad sa Cagayan de Oro, apan anaa lamang sa 76.68 porsiyento ang nakabotar atol sa eleksyon.
Gibutyag ni abogado Ramil Acol, City Election Officer sa Commission on Elections, nga gamay lamang ang nakabotar sa niaging piliay niadtong Lunes.
“Sa total number sa voters, 76.68 porsiyento ang turnout nakabotar ang mga tawo daghang wala nakabotar sab,” matud ni Acol.
Nasayran nga atol sa eleksyon pipila ang nagreklamo gumikan sa kataas sa linya ug hinay nga proseso tungod na usab sa pagkapalya sa makina ilabi na sa vote counting machine ug pipila sa mga presinto usab ang nagmano-mano na lamang aron nga makapadayon hinungdan na usab sa pagkalangan sa mga botante nga makabotar.