NAGPASALAMAT si Cagayan de Oro City Mayor Oscar Moreno sa katawhan sa siyudad sa Cagayan de Oro ug nipasalig nga mas palapdan pa ug ihatag ang serbisyo human usab kini gisuportahan ug gibotaran sa katawhan ning bag-o lang natapos nga eleksyon.
Bisan wala pa maproklamar apan nag-una na si Moreno sa labing ulahing resulta sa City Board of Canvassers nga anaa na usab sa 96.5 porsiyento.
Tipik sa mensahe niini nibutyag nga bisan pa man sa managlahing kolor sa politika angayang respetuhon ang mandatos sa katawhan ug angayang dawaton nga ang eleksyon dunay modaug ug mapildi.
Gi-aghat niini ang mga mananaog nga mamahimong manggihatagon ug mapaubsaon diha sa pag-angkon sa ilang kadaugan, ug sa mga naparot angayang dawaton ang kamatooran nga ang eleksyon dunay kadaugan ug kapildihan bisan pa man nga nasayod ang tanan nga sakit kini alang sa kandidato nga naparot sa eleksyon.
Dako ang pasalamat niini sa katawhan sa pagpabilin kaniya sa katungdanan ug ipadayon ang pinakaulahing termino.
“We cannot thank you enough. We commit ourselves to serve you the best way possible. We will not fail you!” sa pahayag ni Moreno.
Samtang sa social media nagpasalamat si Rufus Rodriguez sa katawhan sa siyudad ilabi na sa ikaduhang distrito nga nisalig ug nisuporta kaniya.
“Sa akong mga pinanggang kaigsoonan sa dakbayan sa Cagayan de Oro, magpasalamaton gayud ako uban sa akong pamilya, dakong pasalamat sa pagbulig kanako ug uban usab sa atong labaw nga makagagahum nga kita nidaug pagka-congressman sa ikaduhang distrito,” pahayag ni Rodriguez.
Nagpasalig usab kini nga suklian sa maayong pagpanerbisyo didto sa kongreso ang paghatag kaniya sa katawhan og kahigayonan nga makabalik sa paglingkod sa pangatungdanan.
Giingong maningkamot nga daghang mga pundo ug proyekto ang madala sa ikaduhang distrito sa siyudad.