NAGPAUWAN og three-point bombs si Stephen Curry aron agakon ang host Golden State Warriors ngadto sa dakong kadaugan batok sa Portland Trail Blazers, 116-94, kagahapon sa Game 1 sa National Basketball Association (NBA) Western Conference finals series.
Si Curry nagpakatap og siyam ka three-point shots sa iyang pagmugna og 36 puntos.
Gumikan sa suporta sa iyang mga kauban, si Curry kanunay lang malibre sa three-point area nga maoy iyang kinaham ug kanunay lang masaag ang depensa sa Blazers ngadto sa 2-time MVP.
“Practice shots,” matod sa usa sa mga sinaligan sa Blazers nga si Damian Lillard kabahin sa mga itsa ni Curry sa three-point land.
Ning duwaa, napamatud-an na sab sa Warriors nga kaya nilang mobarog bisa’g wala ang usa sa ilang labing sinaligan nga si Kevin Durant, kinsa nakasinati og angol sa iyang tiil sa Game 5 sa Western Conference semi-finals batok sa Houston Rockets.
Si Durant kuwestiyunable gihapong makaduwa sa Game 2 gumikan kay padayon pa kining nagpaalim sa iyang angol.
Hinuon, kon magpadayon sa pagpangigo og tres si Curry, labing seguro dili ra magproblema’g dako ang Warriors sa pagtiwas ning maong series.
“I know what I’m capable of on the floor. The situation calls for me to be a little bit more aggressive and hopefully that’ll continue,” matod ni Curry.
“Obviously it’s nice to see the ball go in. I didn’t shoot the ball well for 4 1/2 games the last series and got off to a good start tonight. I want to maintain that. Every game is different, you’ve got to re-establish yourself. That’s my perspective no matter how I play.”
Gilupig ni Curry ang hiniusang puwersa sa duha sa labing sinaligan sa Blazers nga sila si Lillard ug CJ McCollum, kinsa igo lang nagkumboya og 36 puntos.
“It’s good to see Steph have a game like that at a time that obviously we need him most,” matod sa pambato sa Warriors sa depensa nga si Draymond Green.
Ang kauban ni Curry sa Splash Brothers nga si Klay Thompson nitampo og 26 puntos lakip na niini ang tulo ka three-point shots.
“I think we played a terrible game and we still had a chance going into the fourth quarter. So we need to tighten some things up and look forward to the game on Thursday (Biyerne sa Pilipinas).”
Taliwala sa dakong kapildihan, ang Blazers malaumon nga makakawat og kadaugan sa Game 2 aron makahatag kanila og dakong moral sa pagtapon sa series sa ilang balwarte alang sa Game 3 ug Game 4.
“It’s not one-and-done. We’ve got a series, it’s one loss,” asoy ni Blazers coach Terry Stotts.
“We’ve got to play better, particularly at the offensive end, but we’ve got to be better at both ends.” (AP, ESL)