NAHUMAN na ang piniliay, Mayo 13. Daghan ang nagmaya kay midaug sila, apan daghan sab ang naminghoy kay naparot.
Sama sa ordinaryong indibidwal, daghang artista sab ang gisuwayan nga mosud sa natad sa pulitika ang gi-swerte, apan duna say gidemalas.
Duha sa bonggang-bongga ang political career sila Senators Grace Poe ug Lito Lapid, miapas sab si Bong Revilla.
Swerte man sila, apan napakyas sa iyang tumong as senador ang broadcast journalist nga si Jiggy Manicad.
Wa sab giswerte ang "Anak" singer nga si Freddie Aguilar.
Winner na winner sab si Isko Moreno nga gideklarang bag-ong mayor sa Manila, gipildi ang incumbent mayor ug kanhi aktor, Joseph "Erap" Estrada.
All smiles sab ang tsinitong aktor, Yul Servo, nga midaug sa laing termino isip kongresista sa Third District sa Manila.
Daug sab ang kanhi TV host, Camille Villar, isip kongresista sa Las Piñas.
Gikan sa pagka-bise governador sa Bulacan, karon, gobernador na sa dapit si Daniel Fernando.
Midaug sab isip bise gobernador sa Camarines Sur ang Jukebox Queen nga si Imelda Papin.
Bag-ong bise mayor sab sa Quezon City si Gian Sotto, ug pabiling kongresista sa 5th district sa lungsod si Alfred Vargas.
Nag-number 1 sab sa inihapay ang konsehal sa Valenzuela nga si Charee Pineda.
Balik-Kongreso sab ang kanhi broadcast journalist nga si Sol Aragones sa Laguna.
Ang singer si Roselle Nava, winner sab isip konsehal sa Parañaque City, lakip na sila Jomari Yllana ug Vandolf Quizon.
Napildi sab si Jeremy Marquez isip bise alkalde sa dapit. Wa sab giswerte sila Rochelle Barrameda ug Dominic Ochoa nga mipapiling konsehal sa Parañaque.
From director to mayor sa Taguig City ang drama ni Lino Cayetano.
Namayagpag sab isip numero unong konsehal sa Makati si Jhong Hilario.
Apan pakyas si Monsour del Rosario, nga nagpapiling vice mayor sa Makati.
Sa Ormoc City, midaug isip mayor si Richard Gomez ug pagka-kongresista ang misis nga si Lucy Torres-Gomez.
Winner gihapon sa kongreso si Vilma Santos-Recto sa Batangas, samtang konsehal sa Angeles City si JC Parker-Aguas.
Wa sab giswerte si Edu Manzano isip kongresista sa San Juan.
Pildi sab isip konsehal sa Manila si Sheryl Cruz ug Jerika Estrada.
Pakyas sab ang pasiaw ni Long Mejia nga napilding kongresista sa Camarines Sur, lakip na si Roderick Paulate nga mipapiling vice mayor sa Quezon City.
Wa na sab mopabor ang panahon kang ER Ejercito nga napildi human mipapiling gobernador sa Laguna.
Wa sab kalahutay si Rommel Padilla nga mikandidatong kongresista sa unang distrito sa Nueva Ecija.
Samtang ang bana sa aktres, Heart Evangelista, nga si Chiz Escudero, winner isip vice governor sa Sorsogon.
Pipila lamang kini sa mga nahagpat nga ngalan sa Superbalita gikan sa online, labot sa mga artistang giswerte ug wa sa natad sa pulitika.
Sa bag-ong tahas nga giatubang karon sa mga midaug, tumana ang inyong mga saad atol sa eleksiyon, samtang kadtong nangapildi, mag-move on na ta!