MAGUINDANAO -- Nikaratil og panagan ug pamakwit ang mga molupyo sa usa ka barangay sa Pagalungan human mga armadong mga lalaki nangatake.
Nahitabo ang insidente alas 6:05 sa gabii, Martes, Mayo 14.
Nasayran gikan sa taho sa Maguindanao Police Provincial Office nga kalit lang nibutho ang wala mailhing mga armadong lalaki sa Barangay Damalasak sa maong lungsod.
Nasiplatan sa mga molupyo ang mga armado sa may mosque nga dunay gipangita nga mga tawo apan mga nahisgutan kalit lang sab nahanaw human gisita sa mga opisyal sa barangay.
Apan alas 7:00 sa gabii sa maong adlaw, nibalik ang mga armadong lalaki ug mas nidaghan pa.
Giingong nagpaarak sila sa ilang mga M16 Armalite rifles tumong sa kabalayan hinungdan nga namakwit ang mga molupyo.
Dali sab nga nisibat ang mga armado paingon sa hilit nga dapit sa Sitio Pintel, Barangay Balongis sa Pikit, North Cotabato human nga nagsingabot na ang mga pulis ug mga sakop sa 7th Infantry Battalion, Philippine Army.
Daghan nagtuo nga posibleng mga armado nga nanulong sa barangay tagasuporta sa mga naparot nga kandidato sa Pagalungan niadtong eleksiyon. (Edgar E. Fuerzas)