MAGUINDANAO -- Girakrakan sa mga armadong grupo ang balay sa nidaug sa eleksiyon nga bise mayor alas 10:15 sa buntag, Martes, Mayo 14, sa Talitay sa probinsiya.
Sumala kang Philippine Army's 6th Infantry (Kampilan) Division spokesman Major Arvin Encinas nga girakrakan og mga bala sa giingong grupo ni Kumander Mike City ang balay ni Montasir Sabal.
Apan wala nagpalupig ang grupo ni Kumander Salin Datan Payang nga nagprotekta kang Sabal, hinungdan nga nahitabo ang binakbakay.
Tungod niini, mga molupyo sa tulo ka mga barangay sa Talitay nga mao ang Poblacion, Gadungan ug Kilalan namakwit tungod sa kahadlok nga maipit sa giyera.
Nisamot pa pag-ulbo ang giyera human nga pulos nangabot ang dugang puwersa sa duha ka kumander nga giingong mga miyembro sa Moro Fronts sa Mindanao.
Nahunong lang ang binakbakay sa dihang nangabot ang mga sundalo ug pulis.
Wa hinuoy nakalas nga kinabuhi o naangol.
Gimandoan na ni 6th ID chief Major General Cirilito Sobejana ang iyang mga ginsakpan nga makig-alayon sa government-Moro Islamic Liberation Front ceasefire committee aron maresolba ang kagubot sa Talitay. (Edgar E. Fuerzas)