PLASTADO ug gigamit na ang high-tech digital scanner sa checkpoint sa Task Force Davao (TFD) sa Barangay Licanan, Bunawan District, Davao City sa nakalabay nga semana, diin una na sab nga nag-operate ang sa Barangay Sirawan, Toril, niadtong Abril 18.
Sa pagmuntar sa maong scanner, mapasigarbuhon ang kasundalohan sa TFD gumikan alang kanila, mas dali nalang ang pag-monitor sa mga kadudahan ug gidili nga butang nga masulod sa Davao City.
Sumala ni TFD commander Colonel Consolito Yecla nga nagkinahanglan og dako nga pasilidad alang sa high-tech digital scanner tungod sa kahuot sa gibutangan niini.
"Ang scanner sa Siwaran at nitong sa Licanan ngayon is experimental pa ang design sa facility kay medyo masikip. Kailangan ng mas malaking facility sa metal scanners and detectors. Need pa nato nga i-request," ingon ni Yecla.
Kini na ang ika-duhang x-ray baggage scanner machine ug metal detector sa TFD.
Giingon sab sa opisyal nga kung dili busy ug dunay kaugdahan, paagion ang bus sa scanner nga alang niini, apan kung dili pigado sa oras, ang mga pasahero ang usa-usa nga paagion sa scanner.
Padayon gihapon ang himuong plain view doctrine alang sa mga pribadong sakyanan diha sa pamaagi sa pag-inspeksyon.
Sunod butangan sa maong ekepo mao ang TFD checkpoint sa Barangay Lacson sa Calinan, siyudad sa Davao. (Richy F. Nalagon)