HAPSAY ug malinawon ra ang piniliay sa dakbayan sa Lapu-Lapu niadtong Lunes, Mayo 13.
Kini ang pahibawo ni Police Colonel Limuel Obon ang director sa Lapu-Lapu City Police Office LCPO.
Matod ni Obon walay natala nga mga insidente sa dakbayan atol sa piniliay nga may kalabot sa mga kagubot o bisan unsa nga insidente nga kinahanglan og police intervention.
Walay nadakpan sa pagpatuman sa liquor ban nga gipatuman sa Mayo 12 sa tungang gabii hangtod sa Mayo 14.
Adunay hinuoy mga nadawat nga taho ang LCPO kalabot sa posibleng kaso sa vote buying apan atol sa pagresponde sa kapulisan kalabot niini wala gayud kini maabti ug wala na usay mobarog nga mga reklamante.
Dako ang pagtuo ni Obon nga ang sayo nga pag deploy sa mga police personnel ug ubang augmentation force sa Phil Airforce ug Navy nianang Mayo 9 pa lang nakatampo ug dako sa kahapsay sa piniliay sa dakbayan.
Ang mga sakop sa LCPO nga gipang-augment usab sa lalawigan sa Bohol miabot na pagbalik sa Sugbo ug gikatakda silang mobalik og report sa LCPO headquarters sa umaabot Biyernes Mayo 17.
Dul-an sa 60 ka mga personnel sa kapulisan ug Air Force ang gipabantay hinuon sa Lapu-Lapu City Hall atol sa canvassing miaging Mayo 13 sa gabie sanglit nagtapok ang mga supporters sa mga kandidato sa gawas nga bahin sa city hall nga naghuwat sa resulta sa piniliay.
Wala ra hinuoy nahitabong kagubot hangtod na sa pagproklamar sa mga mananaog alas 5 sa kadlawon sa Mayo 14 diin adunay nagpabuto ug fireworks gumikan sa ilang kadaugan.
“Way failure of election so far ug wala ray nagpabadlong, siyagit man lang to sa kalipay sa supporters” pagpasabot ni Obon. (GCM)