GIKAN sa tulo lang ka mga treatment center alang sa Human Immunodeficiency Virus (HIV)/Acquired Immunodeficiency Syndrome (AIDS) niadtong 2017, duna nay 13 karong tuiga.
Mao kini ang gibutyag sa Department of Health (DOH) 7 karon nga nagpadayon usab ang kaso sa gidaghanon nga anaa niining sakita.
Matod ni Dr. Van Phillip Baton, ang program coordinator sa HIV/ADIS sa DOH 7 nga daghan na ang maduolan sa publiko alang sa libre nga testing ug libre usab nga tambal.
Mao kini ang Cebu Social Hygiene Clinic, Mandaue City Social Hygiene Clinic, Talisay City SHC, Vicente Sotto Memorial Medical Center, Negros Oriental Provincial Hospital, Gov. Celestino Gallares Memorial Hospital, Visayas Community Medical Center, Eversley Child Sanitarium and General Hospital, Talisay District Hospital, Balamban Provincial Hospital, Carcar Provincial Hospital, Danao City SHC, ug Chong Hua Hospital-Mandaue.
Samtang sa uwahi nga datus sa maong ahensiya anaa na sa tulo ka tawo matag adlaw ang mataptan niining sakita sa Central Visayas.
Anaay napuno nga 90 ka kaso alang sa buwan sa Pebrero diin niabot na sa 187 ka kaso ang napuno sa 2019.
Namatikdan usab nga sa 90 nga napuno sa Pebrero, 88 niini mga lalaki.
Daghan gihapon ang nagpangedaron og 25-34 anyos.
Gibutyag usab ni Baton nga sa nasod, aduna’y usa ka tawo ang mataptan sa HIV/AIDS matag oras sa labing uwahi nga datus.