SECTIONS
Tuesday, May 21, 2019
SUPERBALITA CEBU

Labella mopa-release sa motor

PASALAMAT: Nahinangop ang mga manindahay og kandila sa Basilica Minore del Santo Niño sa pagkakita nila kang Cebu City mayor-elect Edgardo Labella, kinsa nagpamisa pasalamat sa iyang pagdaog sa eleksyon niadtong Mayo 13. Si Labella nisaad nga mopatuman og mga kausaban, sama sa wa nay impounding sa mga motorsiklo nga masikop sa pag-counterflow. Estorya sa pahina 2. (Alan Tangcawan)

INIG lingkod ni mayor-elect Edgardo Labella sugod Hunyo 30, iyang libkason ang pagpa-impound sa mga motorsiklo ug sakyanan nga makalapas sa Executive Order Number 34 nga may labot sa counterflowing nga kasamtangang gipatuman sa Cebu City.

Si Labella nagkanayon nga mohimo siya og executive order nga magpahamtang og silot ngadto sa mga motorista nga makalapas sa counterflowing, apan ipasubay na kini sa Cebu City Traffic Code.

Iyang gipasabot nga ipasubay sa Traffic Code mao ang pag-isyu lang og citation ticket o temporary operator’s permit (TOP) sa molapas, kansang penalty di moubos sa P1,000.

Ang pag-impound og 30 ka adlaw gihulagway sa bag-ong napili nga mayor nga anti-poor kun gisamot og duot ang mga kabos.

Daghan sa mga motorsiklong nagdagan sa Dakbayan sa Sugbo mga habalhabal.

“That EO-34 is anti-poor and depriving the poor man of his income because if you impound the vehicles for 30 days, wala intawon siyay pangita. Ug labing maayo sundon ang balaod nga nalatid sa Traffic Code sa pagpahamtang og silot,” dugang ni Labella.

Kining baruganan ni Labella dugay na, sukad nga gipatuman sa Cebu City Transportation Office (CCTO) ang pagpanakop sa mga motorsiklo ug sakyanan nga mo-counterflow.

Wa kini magpasabot nga di na ipatuman ang lagda batok sa counterflow.

Ang mando kaniadto ni Osmena nakaani og pagdayeg sa publiko, apan ang pagpahamtang og bug-at nga silot gisaway.

Matod ni Labella nga delikado ang pagsugat sa lane sa karsada sa nagpadong nga mga sakyanan hinungdan nga angay kining ipatuman.

“We will impose efficiently, effectively the law against counterflowing because it is a clear violation of law,” dugang sa mayor-elect.

Si Osmeña nilagda sa Executive Order-034 niadtong Pebrero 2018, kansang silot mao ang pag-impound sa sakyanan og 30 ka adlaw.

Ang CCTO wala pa makahatag og updated nga gidaghanon sa nadakpan nga mga sakyanan.

Apan subay sa ilang record niadtong Pebrero 2019, niabot na og 8,000 ang nadakpan sukad gipatuman ni Osmeña ang mando.

Sa nasikop, di momenos 90 porsiyento ang mga motorsiklo.

Niadtong Disyembre 2018, human gipa-release sa mayor ang mga motorsiklo, mga 300 na lang ang naa sa kustodiya sa CCTO.

Bisan sa mando ni Osmeña, nagpadayon ang traffic enforcers sa pagpanakop sa mo-counterflow.

Kawit

Samtang gusto ni Labella nga i-renegotiate ang kontrata nga gisudlan sa City Government may labot sa P18 bilyones nga development sa Kawit Island kon moasumer na siya mayor.

Ang umaabot nga mayor niingon nga dehado ang City Government sa bahinay sa kita sanglit base sa gilagdaan nga joint venture agreement, makadawat lang ang Siyudad og 10% sa annual sale sa rental sa Universal Hotel and Resorts Inc. (UHRI) walo ka tuig human sa pinirmahay sa kontrata.

Mao kini ang gisaway nila ni Labella ug sa iyang kaubanan sa Barug PDP Laban.

“We are not totally against it ( the project). We have to review the sharing scheme that is considered as onerous. Naana man na so we just have to re-negotiate it so that the city will have a fair share and the City will not be at its total disadvantage,” padayag ni Labella.

Ang Isla de la Victoria usa ka proyekto sa UHRI diin si Osmeña ang naningkamot para sa maong kalambuan.

Si Labella, kasamtangang bise mayor, wa moklaro kon unsay kabag-ohan nga gusto niyang ipatuman.

Apan sa niaging mga buwan sa wa pa hingpit napirmahan ang JVA, gusto nila nga straight lease matag metro kwadrado sa 10 ka ektaryang luna.

Gipadayag ni Labella nga mahatagan ra og katin-awan ang tanan may labot sa re-negotiation nga iyang buot mahitabo kon moasumir na siya sa katungdanan sugod Hulyo 1.

Ipadayon

Sa samang higayon, gipadayag sa bag-ong napili nga mayor nga magpabilin ang kontrata nga gisudlan sa City Government uban sa Filinvest Land Incorporated, SM Prime Holdings Inc. ug Ayala Land, nga maoy nakapalit sa 45.5 ektaryas nga luna sa South Road Properties niadtong 2015.

Kini nabaligya sa panahon sa adminitrason ni Vice Mayor elect Michael Rama.

Gisaway kini ni Osmeña.

Ang 26.3 ektaryas gipalit sa Ayala Land ug SM Prime Holdings pinaagi sa consortium samtang naangkon sa FLI ang 19.2 ektaryas.

Si Labella niingon nga way rason nga ipa-anular ang maong sale sanglit gipalig-on pa kini sa korte human nidesisyon si Judge Alexander Acosta sa Regional Trial Court (RTC) Branch 18 niadtong Nobyembre 2018 nga legal ang pagbaligya sa yuta.

Kini sukwahi sa baruganan ni Osmeña kinsa gustong mopaka way bili sa pagbaligya sa yuta.

Ang 46.2 ektaryas nahalin og tag P38,000 matag metro kwadrado diin gidoble ang P19,000 nga floor price nga gilatid sa Commission on Audit (COA).

Si Osmeña niingon nga gi-underpriced sa Rama administration ang luna sanglit ang maong propiedad mahalin og P110,000/square meter.

Hapit na motangkod og duha ka tuig sukad gihatagan og pagtugot si Osmeña sa Konseho nga makabaligya sa luna base ning mao nga presyo.

Apan sa tulo ka mga public bidding nga gipahigayon niadtong Enero, Pebrero ug Abril, way mga developer nga niitsa sa ilang bid amount para mahalin ang tulo ka ektaryang yuta nga gustong ibaligya ni Osmeña.

Hapit na motangkod og duha ka tuig sukad gihatagan og pagtugot si Osmeña sa Konseho nga makabaligya sa luna base ning mao nga presyo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!