GIKULIT sa San Miguel Beermen ang makasaysayong ika-15 nga 3rd placed trophy human gikulating ang sister team Barangay Gin Kings 95-88, niadtong Miyerkules sa 2009-2010 PBA Philippine Cup sa Araneta Coliseum.
Base sa talaan, ang Beermen maoy pinakadaghang nasakmit nga 3rd place award sa pinakakaraan ug pinakadakong liga sa nasod.
Nagsunod ang Alaska Aces (12), Tanduay Rhum Masters (9), Swift Mighty Meaties (8) ug Gin Kings (7).
Sayo niini, si Olsen “Rah-rah” Racela sa SMB nikulit usab og bag-ong rekord dihang iyang girehistro sa miaging semana atol sa semis - ang 9 ka steals sulod sa usa ka game kontra Purefoods sa semis.
Gikauban niya sa maong rekord ang mga sikat nga mga basketbolista kaniadto nga sila si Orly delos Santos, Johnny Abarrientos ug ang Sugbuanong Willie Generalao.
Sa championship series, gilabni sa Purefoods Game One sa ilang best-of-seven series pinaagi sa pagpukan sa Alaska Aces, 81-77.
Sila si Rafi Reavies ug KG Canaleta maoy miselyo sa kadaugan sa Giants pinaagi sa katapusang siyete puntos samtang si Mark Pingris mitali og double-double nga may 13 points ug 13 ka rebounds.
Tinguha sa Purefoods nga mainat ang bintaha ngadto sa 2-0 karong gabii sa dihang mag-abot na usab sila sa Big Dome.
Samtang nag-ilogay karon alang sa Best Player of the Conference (BPC) awards sila si Willie Miller (31.0) ug Joe Devance (31.7) sa Alaska, James Yap sa Purefoods, Kelly Williams sa Sta. Lucia (40.6SP’s), Arwind Santos (35.4) sa SMB ug Mark Cardona (30.7) sa Talk n Text.
Laing mga kandidato para MVP mao sila si James Yap ug Kerby Raymundo (Purefoods), L.A. Tenorio (Alaska) ug Gabe Norwood (Rain or Shine). (DQG-correspondent)