SECTIONS
Sunday, May 26, 2019
SUPERBALITA CEBU

Away sa kabtangan: 3 patay

AWAY sa kabtangan sa usa ka pamilya nisangko sa maduguong hitabo, tulo ka mga kinabuhi ang nakalas sa San Jose Village, Barangay Lawaan 3, Dakbayan sa Talisay Huwebes sa buntag, Mayo 16.

Barangay kapitan sa Lawaan 3, Jimmy Batirlic, kinsa gihangyo ni Mc Jed Ybañez nga magpatunga unta tali kaniya ug sa iyang ama-ama nga ex-US Marines naangin, giapil pagpusil patay.

Sila si Ybañez ug Batirlic gipamusil sa suspek nga si Dean Torrefranca, mga 60 anyos ang edad, dihang niadto kini sa balay sa nauwahi.

Si Torrefranca napusilan patay usab sa usa ka pulis nga apil sa ningresponde sa alarma.

Ang mga lumolupyo sa dapit gihakop sa kahadlok dihang nahitabo ang pinusilay tali sa kapulisan ug kang Torrefranca, kinsa armado og taas nga kalibre sa armas.

Giawayan

Ang gikabangian tali sa mga Ybañez ug ni Torrefranca mao ang mga kabtangan nga kabilin ni anhing Lawaan 3 Barangay Captain Delia Ybañez-Torrefranca.

Si Jed anak sa unang bana ni Delia. Si Delia, kinsa namatay upat ka mga buwan ang nakalabay, naminyo kang Torrefranca tulo ka mga tuig na usab ang nakalabay.

Human mamatay si Delia tungod sa sakit, nagsugod ang panagbangi nila ni Jed ug Torrefranca, kalabot sa mga kabtangan.

Kagahapon sa buntag, si Jed nagpakuyog kang Batirlic sa pag-adto sa balay nila ni Torrefranca aron unta kuhaon ang mga papeles sa mga katigayonan nga gibutang sa usa ka vault.

Lakip usab sa kuhaon ni Jed ang yawe sa sakyanan sa iyang inahan nga maoy kanunay nga gigamit sa suspek.

Apan diha pa lang sa pultahan, giingong nagbit-bit na kinig taas nga kalibre sa armas ug dayong pamusil sa duha.

Dali nga ninglibot silang Jed ug Batirlic sa luyo sa balay bisan kon sila samdan na.

Ningsulod sila sa balay sa silingan, apan gigukod sila ni Torrefranca ug gipangtiwasan hinungdan sa ilang kamatayon.

Mga silingan nga nakasaksi sa hitabo nanawag dayon sa mga pulis sa siyudad sa Talisay.

Sa dihang dakpon na unta si Torrefranca, ang mga pulis na usab ang gipaarakan sa suspek gamit ang AK47 rifle.

Wa makaatraka ang kapulisan ug nipahibawo kini nga nanginahanglan sila og back-up.

Pinusilay

Ningresponde na ang mga sakop sa Special Weapons and Tactics sa siyudad sa Talisay, Regional Special Operations Group 7 ug Provincial Mobile Force Company, apan nagdumili gihapon pag-surrender si Torrefranca.

Dinhi na gisunog ni Torrefranca ang ilang balay aron di siya makita sa mga pulis nga nagpalibot kaniya.

Matod ni Police Major Adioleto Cabagnot, deputy chief sa Talisay City Police Station, nakakita nga adunay naglihok nga tawo sa bintana sa ground floor sa balay, iya dayon kining gipusil.

Wa siya magtuo nga iya ning naigo si Torrefranca.

Sa pagkapawong na sa kayo nga nikaon sa balay ilang nakita nga naghayang na si Torrefranca nga paig ug patay na.

Naa sa iyang kilid ang AK47 rifle ug grenades.

“Iyang gisunog ang balay. Strategy niya para dili siya makit-an sa sulod nya wala siya mag expect nga ang kayo diay mao ra poy mo lamoy niya. Pero naigo na siya daan,” matod ni Cabagnot.

Matod ni Cabagnot nga wa dayon sila moatraka sa balay tungod sa nakuha nga impormasyon nga aduna kini dala nga AK47, granada, KG 9 pistola ug kalibre .45 nga pistola.

Human masuta nga namatay si Torrefranca, gisirad-an na sa kapulisan ang imbestigasyon sa hitabo, matod ni Police Brigadier Debold Sinas nga nangunay sa pag-supervise sa iyang mga sakop.

Gihimakak ni Sinas nga adunay mga pulis nga nangasamdan sa engkwentro sukwahi sa unang nanggawas nga balita.

Sutaon sa kapulisan diin og high-powered nga armas ug eksplusibo si Torrefranca.

Gustong angkunon

Giingong gusto ni Torrefranca nga makaangkon sa mga katigayonan ni Delia, apan wa motugot ang mga igsuon ug duha ka mga anak sa namatay nga kapitan.

Gusto sa mga anak nga papahawaon na sa ilang balay si Torrefranca kay matod pa way katungod nga moangkon niini.

Apan giingong nagdumili pagpahawa si Torrefranca hinungdan nga gireklamo sa barangay.

Si Boboy Onabia, kanhi pulis sa Dakbayan sa Sugbo, igsuon ni Delia, nagkanayon nga ila nga papahawaon unta si Torrefranca sa balay sa iyang igsuon kay wa ni katungod nga mangangkon sa gibilin nga katigayonan sa iyang igsuon.

“Amo na gyud na siya papahawaon anang balaya kay dili man na iya, sa ako man nang igsuon kay napalit niya na katong wala pa na sila makasal,” matod ni Onabia.

Niadtong Martes sa buntag, matod ni Dr. Lino Alanzado sa Talisay City Health Department, si Jed nga iyang sakop, nisulti nga gihulga siya ni Torrefranca nga pusilon.

Usa ka semana na nga nag balik-balik sa barangay hall sa Lawaan 3 si Jed tungod sa mga butang sa iyang inahan nga iyang kuhaon.

“Gahapon, nakighusay lang unta siya (Jed) ato. Murag gisultihan siya nga rakrakan ta hinuon mo ron. Mao to nga makighusay unta siya sa barangay karon,” matod ni Alanzado.

Gawas sa balay sa kanhi kapitan sa San Jose Village, aduna pa usab kini balay sa Labangon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!