SA DIHANG naglabaw pa si Benigno Noynoy Aquino III og halos tinunga sa iyang mga kaatbang nga mga presidentiable sa milabayng tuig, maoy anaa sa alimpatakan ug kasingkasing sa katawhan ang dakong simpatiya sa kamatayon sa iyang inahan nga si Cory Aquino nga giisip nga “Icon of Democracy” dili lamang sa atong nasod sa Pilipinas kon dili sa tibuok Asya.
Dinhi usab napukaw ang kadasig sa pagtuboy kang Noynoy sa pinakataas nga buhatan sa nasod, kay kasagaran sa karaang mga supporter ang nagtuo nga tungod sa scandal ridden administration ni Presidente Gloria Macapagal Arroyo, karong higayuna, nanginahanglan na usab ang nasud og linahi nga rebolusyon aron hingpit dang malukapa ang nakaugat nga kultura sa kurapsyon sa halos tanang institusyon sa pangagamhanan.
Kurapsyon maoy hinungdan nganong nagkabikos-bikos ang katawhan ug dili gyud kita mo-asenso kay mahisusama man da ang kaban nasod sa usa ka alkansiyang buslot. Bisan og unsaon sa pagpuno pinaagi sa way puas nga paningkamot, dili gyud kini mapuno kay anamon man sab og surikbot.
Mao nga namugna ang piso-piso nga kampanya ni Noynoy diin ang mga kabus ug masang mga Pilipino ang kinasingkasing nga miamut sa ginagmayng kantidad nga maabot sa ilang bulsa aron mahatagan og katumanan ang gidamgong limpyong pagpanerbisyo.
Mao kini nga ang gugma ni Noynoy nibwelta batok sa kwarta sa labing duol niyang kakompetensiya nga si Manny Villar.
Apan sa pagdagan sa mga adlaw paingon sa Mayo 10, 2010 nga presidential elections, hinay-hinay nga nausab ang lagda sa kumbati kay inay ang mentalidad sa mga botante mao ang Gugma versus Kuwarta, karon ang simpatiya nibali sa anak sa kabos batok sa anak sa adunahan. Nga gisugnuran pag maayo sa dili mabangbang nga political advertisements.
Hinungdan nga sa latest Pulse Asia Survey nga gipahigayon niadtong Enero 22 ngadto sa 26, ning 2010 nga nagasentro kon si kinsay adunay highest trust ratings nga magpresidente, nigawas nga nag-una si Manny Villar nga nakahipos og 70 porsiyento.
Ikaduha na lang si Noynoy Aquino nga nakakuha og 64 porsiyento, Erap Estrada 33 porsiyento, Gibo Teodoro 31 porsiyento, Richard Gordon 26 porsiyento. Mao kini ang talagsaong dagway sa kinabuhi sa tawo ning atong material nga kalibutan. Kay sa dihang anaa pas kalisdanan ug kakabus, muna sa ginhawa gyung moeskrima sa tanang mga pagtamay ug pagsaway tungod sa kapobrehun.
Apan sa higayon nga mosud na gani sa pulitika, ang kapobrehun nga munas ginhawang gitago kaniadto, karon mao nay iwara-wara sa pagbandilyo sa tanang mga advertisement sa radyo ug telebisyun.
Ang nakapait lang ning atong kahimtang kay nahimo nga personality based ang pagpili sa katawhan ug way klarung programa o plataporma de gobyerno nga maoy mahimong blue print of action sa buhatong pagpanerbisyo. Hinungdan nga human unya sa “honeymoon days” sa mapiling bag-ong presidente, dili ikahibung nga mobalik da usab kita sa naandang pagsukarap ug pagsukamod.