ADUNA nay tulo ka persons of interest ang kapulisan sa Mandaue City Police Office (MCPO) nga may kalambigitan sa pagpanunggab sa 18-anyos nga lalaki sa dalan sa may Barangay Basak, siyudad sa Mandaue, niadtong alas 2 Miyerkules sa kaadlawon, Mayo 15.
Usa niini ang giingon nga amahan sa kontra sa biktima.
Taud-taud na nga away diha sa duha ka gang ang gisunod nga motibo sa kapulisan sa pagpanunggab-patay kang Joviel Casas Bug-ot.
Si Bug-ot matud sa inahan nga si Emily Bug-ot nag-18 anyos na niadtong Marso 2.
Ang Basak Police, pinanguluhan ni Police Major Ramil Morpos ang aduna nay tulo ka mga persons of interest, anaa nay mga pangalan niini, apan nagdumili una sa pagtug-an ang kapulisan kay ipa-identify pa ngadto sa mga saksi.
Giingon nga si Bug-ot ang sakop sa gang nga gitawag og Knox-son, samtang ang kontra niini ang giingong mga sakop sa Turner gang.
Giangkon sa tigpamaba sa MCPO, Police Major Mercy Villaro, nga usa na sa nahimo nga problema sa kapulisan ug sa barangay ang maong away sa mga gang, nga kasagaran mag-abot sa merkado sa Barangay Basak ug manag-rambol.
Giingon nga ang mga suspetsado, mga armado, hinungdan nga gipalawman pa sa kapulisan ang pakisusi kay posible nga mga nalambigit pa sa ubang krimen ang mga sakop sa maong gang sama sa kawat.
Samtang giangkon usab ni Morpos nga ang biktima nga si Bug-ot ang nasikop niadtong Marso sa niaging tuig, tungod gihapon sa panag-away sa duha ka gang, wala lang mapriso kay menor de edad pa niadtong higayuna.
Ang inahan sa biktima, Emily, 39, ang niangkon nga laagan gyud ang ikaduhang’ anak ug dili gyud papugong, ilabi na sa kagabhion ug mauli nalang buntag na.
Apan bisan pa man panawagan sa inahan sa grupo ug sa nakadunggab, nga dili makatarunganon ang gihimo nga pagpatay, ug hangyo niya sa suspetsado nga motahan na aron sa pag-atubang sa kaso.
Kasamtangang gihaya sa gawas sa ilang panimay sa may 6.5 relocation site sa Barangay Paknaan, syudad sa Mandaue ang biktima.
“Nganong patyon pa man gyud, gidunggab nga murag baboy, bisan ingon ana na akong anak, nagtinguha na biya unta na nga mobalik sa pag-eskwela. Mas maayo motahan nalang gyud ka, ingon amahan man daw na, ngano imu pa man intawn (gipatay), imbes ikaw mobuyag sa imung anak, nga moundang na,” kahilakon nga hangyo sa inahan.