Nihangyo ang Mandaue City Commission on Elections (Comelec) sa mga nikandidato alang niadtong Mayo 13 nga piniliay nga sila na mismo ang mopatang-tang sa ilang mga campaign materials kun mga tarpaulin ug billboard atol sa campaign period.
Dili na nila maato pa sa Comelec nga mao pa may manangtang sa tanang mga campaign posters, billboard ug uban pa sa mga kandidato.
Hinungdan nga pahinumdom ni Jacqueline Reuyan, ang assistant election officer sa Mandaue City Comelec, nga isip nagpapili sa pagka-public servant, modaug man o mapildi, angay lang nga sila mismo ang mangunay sa pagpanglimpyo diha sa ilang mga gipangpatapot nga mga campaign posters.
Hinuon gitug-an ni Reuyan nga aduna na silay mga nadawat nga report nga niadto palang Martes, usa ka adlaw human ang election, ang kampo sa napildi nga incumbent mayor ug bise mayor sa Mandaue City, Luigi Quisumbing ug Carlo Fortuna, ang sugod na nipatang-tang na sa ilang campaign posters.
Gani Huwebes sa buntag, diha sa may Barangay Paknaan, naatlan sa pipila ka tigbalita ang ubang mga supporters sa grupo nga nanangtang sa ilang billboard.
Gitug-an usab ni Reuyan nga sa kampo nila Kongresista Jonas Cortes, kinsa ang tibuok slate ang nidaug sa piniliay, ang nagpasugod na usab sa pagpatang-tang.
Nanghinaot sila nga bisan na kadtong mga kandidato sa national, sa pagka-senador ug sa mga partylist ang mohimo na sa ingon.
Hangyo nila nga unta dili na kini langayon pa.
“Patabang mi, sila nalang gyud unta ang manangtang, kay sila man ang nagpabutang ana. As soon as possible, Asap gyud,” hangyo ni Reuyan.
Samtang gipahinumduman na usab ang mga nikandidato nga mag-andam alang sa pagsumite sa Statement of Contributions and Expenditures (SOCE) o mga nagasto atol sa campaign period.
Deadline sa pagsumite, 30 ka adlaw human sa piniliay, o karong June 12.
Matud ni Reuyan nga nidaug man o napildi, tanan nga nikandidato ang gikinahanglan nga mosumite niini.
Ang mga kandidato nga dili maka-submit ang padad-an og demand letter uban na ang mga corresponding penalties gikan sa Campaign Finance Division of Commerce.
Ang mga nidaug nga dili makahatag, posibleng mamilegro ang ilang katungdanan, gani posible pa nga ma-disqualified nga mogunit og pampubliko nga buhatan hangtud sa hangtud.