DAMGO ni Cebu City Mayor Tommy Osmeña nga maka-eskuyla ug makahuman sa kolehiyo ang tanang kabataan sa dakbayan.

Maong nigahin ang dakbayan og P100 milyunes nga scholarship fund alang niadtong mogradwar sa mga public high schools karong sunod buwan.

For updates from around the country, follow Sun.Star on Twitter

Labing menos P10,000 ang hinabang sa syudad sa matag gradwado nga motungha sa kolehiyo ug mahimo pa kining mosaka sa P30,000.

Sa katapusan, nakahuna-huna na gyud si Mayor Tommy niini human mag-alagad og mokabat sa 15 anyos isip mayor.

***

Giklaro ni Mayor Tommy nga di pamolitika ang iyang P100 milyunes nga scholarship fund ug kausa ra ni kay pang-eleksyon ra.

“The ground is being laid out for all of our children to go to college,” matod pa niya.

Gawas pa niana, niingon ang mayor, kanunay siyang naghuna-huna sa mga kabos kay ang mga  kabos mao man ang nakapahimo niyang mayor sa unang higayon nga nidagan siya.

Tingalig nakahinumdom siya karon sa mga kabos nga maoy makapahimo niyang kongresista sa south district sa syudad.

***

Morag arang-arang na gyud tingali ang kahimtang sa panalapi sa syudad kay ang ikatulong supplemental budget karong tuiga mokabat man og P1.3 bilyunes.

Naglakip kini sa P100 milyunes nga scholarship fund ug P24 milyunes nga mag-umento sa allowances sa mga huwes sa syudad gikan sa P5,000 ngadto sa P30,000.

Di man kini matawag nga suburno sa mga huwes kay mahimo man kining ihatag pinaagi sa Korte Suprema.

Pero morag pasidaan sa mga piskal nga nagdiki-diki sa pag-prosecute busa wa umentohi ang ilang allowance.

***

Niingon si Mayor Tommy nga kon mapili siyang kongresista, maoy unahon niyag gukod kadtong mga food supplements ug herbal medicines nga tambal sa tanang

balatian sama sa gibaligya sa iyang kaatbang nga si Atan Guardo.

“I will crack down dubious drugs that cure you of cancer, high blood or whatever,” matod pang Osmeña.

Daghag gukdunon sa mayor kay naghitak karon ang mga food supplements.

Pero yuna pa, modangop kaha ang mga tawo sa mga food supplements ug mga herbal medicines kon makahatag pag libreng tambal ang Cebu City Medical Center (CCMC) ug ang mga barangay health centers?

***

Mo-boycott si Mayor Tommy sa March 13 nga plebisito alang sa pagmugna sa bag-ong barangay nga pagatawgon og Englis-Banawa nga tipakon gikan sa Barangay Guadalupe.

Kay ang iyang diayng gusto mao nga bahin-bahinon ang Guadalupe og katulo.

Sa ato pa, kon mabuwag na ang Englis-Banawa, di na kini mapikas pa?