GIPASALIG ni reelectionist Cagayan de Oro City Vice Mayor Rainier Joaquin “Kikang” Uy nga hatagan og kaangayan ang tanan bisan pa man kung anaa kini sa oposisyon human usab nga duha sa kaatbang sa politika ang mamahimong miyembro na sa 19th City Council.
Nasayran nga sila si reelectionist Konsehal Lordan Suan ug Bebot Rodriguez ang duha sa oposisyon nga nakadaug sa bag-ohay lang natapos nga eleksyon.
Gibutyag ni Uy nga sukad pa kaniadto diha sa pagdumala sa konseho sa dakbayan, gipakita na niini ang patas ug kaangayan alang sa tanan ug gipasalig nga magbaton gyud og komitiba ang matag usa ka miyembro sa konseho ma administrasyon man o oposisyon.
“As a regular members of 19th City Council, natural naa’y minority, naa’y majority atong paminawon ang tanan, the majority rules sa atoang pagdala gitagaan man nato og kaangayan tanan ma minority or majority or ma opposition or ma administration naa gyuy committee I can assure them,” matud ni Uy.
Nasayran nga una na nga nibutyag si Rodriguez nga andam kini mohupot og bisan unsa nga komitiba kung kini hatagan.
“Depende og tagaan ta dawaton nato unsay komitiba ilang ihatag ready ko bisan unsa nga komitiba kung tagaan ta,” matud ni Rodriguez.
Samtang si Suan usab nibutyag nga malipay na kini og mamiyembro sa komitiba basta nga mahatagan lang og kapasidad nga maka serbisyo sa katawhan.
“Depende lang kung unsay ihatag malipay ko, kung walay committee okay ra gihapon basta i-member lang ko in whatever capacity that I can serve the people of Cagayan de Oro,” matud ni Suan.