GIPASALIG sa bag-o lang naproklamar kinsa anaa sa oposisyon nga si Jocelyn “Bebot” Rodríguez nga dili siya babag sa ika-19th City Council sa dakbayan sa Cagayan de Oro.
Nasayran nga hugot ang kampanya sa administrasiyon ni Cagayan de Oro City Mayor Oscar Moreno nga kaabag ang buot niini nga makauban sa pagpanerbisyo sa siyudad ug dili ang babag.
Gibutyag ni Rodriguez nga dili siya babag ug andam siya nga mosuporta sa mga programa nga alang sa katawhan.
“Dili man gyud ko babag because I always follow what is best for the city dili ko pwedi nga magbabag ug unsay ilang programa nga mouyon ko because for the goodness of the city why not? Dili ko magbabag,” matud ni Rodriguez.
Apan gipasabot niini nga dili pa gyud mamahimong magbalik ang maayong relasyon nila ni majority floor leader Ian Mark Nacaya, kinsa dunay panagbangi diha sa politika gumikan kay dulot kaayo ang kasakit sa iyang kasing-kasing ug giingong dili usab niini mamahimong dili buhaton ang angayan diha mismo sa atubangan ni Nacaya.
“Dili para nako kay dili ingon ana kasayon usahay kung masakitan ako usa ka inahan pero in a matter of time in God’s time perhaps, but for now dili pa for me,” dugang niini.
Samtang nibutyag usab si Lordan Suan kinsa anaa usab sa oposisyon nga dili kini makahatag og komento kung ugaling hanggaton nga mouban na lang sa administrasiyon.
“It’s too early and I just want to celebrate sa di sa gusto maghuna-huna og ingon ana nga butang as of now,” matud ni Suan.
Gidugang niini nga okay lang usab kaniya basta nga duna lang demokrasiya nga diin mahatagan sa kahigayonan nga makapadayag sa ilang mga panghunahuna ug natural nga kung daghan ang majority mauyonan gyud ang kagustohan sa kadaghanan.
Una na usab nga nibutyag si Vice Mayor Rainier Joaquin “Kikang” Uy nga magpabilin nga independente ang City Council lakip na ang check and balances diha sa konseho.