“IT'S over now.”
Kini ang pahayag ni Cagayan de Oro City Mayor Oscar Moreno human sa proklamasyon niadtong Miyerkules sa gabii, Mayo 15, sa session hall sa city hall, dakbayan sa Cagayan de Oro.
Nasayran nga nadelatar sulod sa pipila ka mga adlaw ang proklamasiyon tungod sa mga nakorap nga mga secure digital cards hinungdan nga nagpasa og motion ang kampo ni Moreno nga ipaubos sa 90 porsyento ang boto sa proklamasiyon ug naaprobahan kini hinungdan nga nahitabo ang proklamasyon.
Una na gibutyag ni abogado Dale Bryan Mordeno, legal council sa Partido Demokratiko Pilipino, nga dili na makaapekto ang 10 prosinto sa nahibilin nga transmisyon hinungdan nga mahimo na silang maproklamar.
Gipadayag ni Moreno ang pasalamat sa katawhan ug nibutyag nga kinahanglan nga mag-move on na alang sa kalamboan ug kaayohan sa katawhan sa siyudad sa Cagayan de Oro.
“Mapasalamaton ako sa tanan, we now have to pause and reflect the judgment of the people. Of course, we need to move on for a better Cagayan de Oro, we need to move on for a better life for all our people,” matud ni Moreno.
Samtang wala na kini nagkomento sa dihang gipangutana kung napasaylo na niini ang kaatbang sa politika ilabi na ni Jose Gabriel “Pompee” La Viña kinsa giingong grabe ang mga pagpangatake kaniya panahon sa kampanya, apan nibutyag nga okay lang ug nahumana na ang tanan.
Gani nagpasiaw pa sa dihang gipangutana kung unsa ang iyang mensahe kay La Viña apan giingong nahuman na ang tanan.
“Okay lang. Part of the exercise, of course, it was a different style of campaigning, it’s over now,” pahayag ni Moreno.
Nasayran nga sa pagsulat niini nga balita pabiling nagpakahilom ug walay mga giluwatang pahayag ang kampo ni La Viña.