ANAA sa halos 200 ka kabataan ang misalmot sa Barangay 76-A Summer Futsal Clinic nga opisyal nga gilusad, Sabado, Mayo 11 sa S.I.R. Phase 1 Gym sa Matina, Davao City.
Si Philippine Sports Commission (PSC) commissioner Charles Raymond Maxey, nga mitambong sa pagbukas sa programa nagsulti nga malipayon sila
sa pagpahigayon sa barangay-based summer sports program alang kabataan.
“Mandato ni President Duterte nga matagaan og oportunidad sa sports ang mga barangays pinaagi sa clinic og tournaments. Pasayloa mi nga dugay mi nakaanhi sa inyong lugar dapat sauna pa,” ni Maxey.
Mga partisipante, nag-edad og syete ngadto 15 anyos gikan sa S.I.R. 1 ug 2, Kabacan, Times Beach, Bucana ug Isla Verde.
Si PSC-Philippine Sports Institute (PSI) coordinator Melchor Anzures, nga nag-coach sa Davao Aguilas Football Club (FC) sa nakalabay nga Philippine Football League (PFL) season, nanguna sa clinic nga gisuportahan sa Davao South Regional Football Association, Football for Humanity ug Maharlika Sports Foundation, Inc. katambayayong ang Barangay 76-A officials sa pagpanguna ni barangay captain Rolando Trajera.
Human sa clinic, si Anzures nagdugang nga sila mohimo og duha ka adlaw nga torneyo, Mayo 22 ug 23 samtang ang juggling and accuracy competition karong Mayo 24.
Ang awarding ug closing ceremonies, diin gilaumang keynote speaker si PSC Chairman William “Butch” Ramirez himuon sab, Mayo 25. (PR)