MALITA, Davao Occidental -- Gidominar sa pamilyang Bautista ilawom sa partidong Hugpong ng Pagbabago (HNP) ang lima ka mga lungsod sa probinsiya.
Wa say kalaban ang mga Bautista hinungdan nga yanong naangkon ang kadaugan sa mga tag-as nga posisyon.
Si re-electionist Governor Claude Bautista, kinsa regional president sa HNP, ang anaa na sa ikaduhang termino isip gobernador ug bisan way kaatbang miani gihapon kini og 83,982 boto sa 77.82 porsyento nga naihap nga election returns (ERs) alas 8:34 sa buntag, Huwebes, Mayo 16.
Ang maguwang ug running mate niini nga si Franklin Bautista aduna say boto nga 78,588.
Ang igsuong babaye, si re-electionist Representative Lorna Bautista-Bandigan, nakakuha sab og 75,115 boto.
Ang pamilyang Bautista sab ang naghupot og tag-as nga posisyon sa kapital nga lungsod sa Malita.
Subling napili si Malita Mayor Bradly Bautista (anak ni Franklin) ug bisan way kaatbang nakakuha gihapon og 44,519 sa 98.91 porsyento sa certificate of canvassed.
Ang running mate niini, kanhi konsehal Esma Bautista, anak ni kanhi Malita mayor ug incumbent Vice Mayor Benjamin Bautista, nakakuha sab og botong 43,022.
Ang igsuon ni Esma, si Benjamin Bautista III, maoy nag-una sa Sangguniang Bayan sa botong 40,776.
Mga Bautista allies sa nagkadaiyang munisipyo nagmalampuson sab sa ilang kadaugan.
Sa lungsod sa Sta. Maria, subling napili si Mayor Rudy Mariscal (HNP) sa botong 17,944 batok sa kaatbang nga si Sigfredo Merka (IND) nga nakakuha lang og botong 4,203 sa 100 porsyento canvassed sa ERs.
Ang iyang anak ug running mate nga si Josephine Mariscal nakakuha og 12,991 boto batok sa kaatbang nga si Solo Lino nga adunay 8,800 boto.
Sa Sarangani, subling nidaug si Mayor Virgie Cawa (HNP) sa boto nga 5,480 batok sa kaatbang nga si Mar Lagudas nga miihap lang og 4,868 boto.
Ang iyang running mate ug stepson nga si Jerry Cawa Jr., mao na ang bise mayor sa boto nga 5,428 batok sa kaatbang nga si Jose Cawah Jr., nga anaa lamang sa 4,722 boto.
Ang pamilyang Joyce sa Jose Abad Santos nga kaalyado sab sa mga Bautista maoy nidominar sa lungsod.
Si Bise Mayor Jason John Joyce mao na ang napiling mayor human nagkambyo sila sa iyang amahan nga si Mayor Jimmy Joyce nga mao na ang bise mayor.
Ang magsuong sila Hadjie ug Jayjay napili sab nga konsehal sa lungsod.
Samtang, ang igsuon ni Jason nga si Jardin napiling bokal sa probinsiya.
Sa Don Marcelino, subling nagmadaugon si Mayor Michael Maruya nga way kaatbang apan nakakuha og boto nga 8,564 sa 100 porsiyento nga ihap sa ERs.
Ang running mate niini nga si Stephen Johnson nakakuha lamang og boto nga 6,472 hinungdan nga ang independent candidate nga si Mana Cadulang maoy nidaug nga bise mayor sa botong 9.192. (Orlando B. Dinoy)