WAY piyansa nga girekomenda ang korte batok sa usa ka babaye nga giingong nalambigit sa child pornography human gipasakaan og kaso sa dihang nadakpan niadtong milabay nga semana sa Sto. Tomas, Davao del Norte.
Ang suspek nga giilang si Merdeka Antido, nagpuyo sa nahisgutang lungsod, nalit-ag sa operasyon sa hiniusang puwersa sa Women and Children Protection Center-Mindanao Field Unit (WCPC-MFU) sa Philippine National Police (PNP) nga nakabase sa Zamboanga City, sa pakig-alayon sa Department of Justice-Inter-Agency Council Against Trafficking-Region XI (DOJ-IACAT-XI), Anti-Trafficking in Person Task Force (RATTF XI), Department of Social Welfare and Development (DSWD) XI, Regional Intelligence Division XI sa PNP, Sto. Tomas Municipal Police Station, ug sa International Justice Mission (IJM).
Nasayran nga human nakadawat og taho gikan sa US Federal Bureau of Investigation (FBI) nga si Antido nalambigit sa cyber pornography sa mga kabataang Pilipino sukad pa 2015 uban sa mga langyaw sa nagkadaiyang nasyonalidad isip iyang nga kliyente, ang Zamboanga City-based WCPC-MFU, pangulohan ni Police Captain Rassel Tuliao nilusad og pagpaniid aron nga ikompirma ang nadawat nga impormasyon.
Nilihok subay sa giya sa Investigator for Online Sexual Exploitation of Children (OSEC) ug Internet Crimes Against Children (ICAC) PSSg Joey A. Gumera, ahente sa WCPC-MFU nagpaaron-ingnon nga usa ka langyaw nakighigala sa suspek pinaagi sa Facebook messenger aron nga ibalidar ang taho.
Sa kanunay nilang komunikasyon, na-establisar ni Gumera nga ang suspek nanimuyo sa Sto. Tomas sa maong probinsiya. Sa dihang nakompirma padayon gihapon ang kalihukan ni Antido, mga operatiba sa WCPC-MFU nibiyahe padulong sa lungsod aron nga ilusad ang entrapment operation hinungdan sa pagkasikop kaniya.
Human madakpi, gihatud gilayon ang suspek ngadto sa Office of the Provincial Prosecutor sa probinsiya alang sa inquest proceedings kon diin si provincial prosecutor Norman Solis nakakaplag nga ang suspek dunay nalapas nga tulo (3) ka mga balaod nga mao ang Anti-Trafficking in Persons Act, Anti-Cybercrime Law, ug ang Anti-Child Abuse Law.
Ang kasong Qualified Trafficking in Persons nga gipasaka batok kang Antido dunay silot nga pagkapriso sa tibuok kinabuhi, hinungdan nga way piyansa nga girekomenda alang sa temporaryo niyang kagawasan.
Naglaum ang DOJ-IACAT-RATTF XI nga ang pagkasikop sa suspek
makasanta sa uban pa nga nalambigit sa cyberpornography ilabi na kon giapil ang kabataan.
Ang cyberpornography sa kabataan usa ka transnational crime ug dunay lig-ong panaglambigit ug kooperasyon ang internasyonal nga mga law enforcement nga ahensiya sa nagkadaiyang kanasuran aron nga kombatihon kining salawayon nga buhat aron nga mga nalambigit daling masubay ug madakpan. (Uban sa taho sa PIA/RATTF XI)