DAGHAN nang cyber sex dens dinhi sa Sugbo nga gipangronda sa mga awtoridad.
Apan inay mangahadlok ang mga operator, nag-anam na hinuon kini kadaghan tungod sa kasayon sa operasyon niini.
Magbutang ka lang og personal computer sud sa balay ug konektahan og Internet, mahimo na kining magamit sa mao nga negusyo.
Nagtanyag sab kini og daling kuwarta sa naa ning mao nga matang sa ilegal nga negusyo nga dako sab og kita.
Matod sa usa ka tinubdan, labing minos $40 kun P1,800 sa dollar-peso rate karon.
Kinsa bay di maengganyo sa pag-apil niini kon ang mao nga buhat makatabang og dako sa mga pamilyang kabos.
Alang sa mga ginikanan nga nagtulod sa ilang mga anak sa pagsud niini, mas maayo pa ni kay sa prostitusyon kay wa man mahilabti sa mga lalake ang ilang anak. Igo ra gud nga gipahubo atubangan sa webcam.
Kon naa ang kakabos ug materyal kaayo nga panglantaw sa kinabuhi sa mga tawo nga nalambigit ning matanga sa negusyo, operator man o mga ginikanan mismo, lisod sumpuon kining negusyoha.
Labing bug-at nga silot sa mga tawo nga nangalambigit ini, lakip na ang nagtukmod sa kabataan sa pag-apil ini, ang angay ipahamtang.
Dugangan sab og dagko kaayong multa kon masakpan ug makombikto ang mao nga mga tawo.