SECTIONS
Sunday, May 26, 2019
SUPERBALITA CEBU

Sugilanon: Sa nitso ni Brad Norman

UBAN ni Luz nga akong asawa nanagkot mi sa sam-ang sa Carreta nianang gabii sa petsa dos sa Nobiyembre, nga mao gyud ang matuod nga adlaw sa mga kalag. Dili na kaayo dasok ang managkutay sa sam-ang kon itandi sa petsa uno kanus-a dasok ug naghuot ang mga managkutay sa bisan asang sam-ang dinhi sa siyudad sa Sugbo.

Maoy unang gitultol namo ang lubong ni Brad Norman, ang mitaliwang bana ni Sis Letty, nga silingan ug suod namong kauban sa among ‘couples cluster’ dinhi sa siyudad sa Sugbo. Alang namo ni Luz, nahinugon gayud kami sa kalit nga pagtaliwan ni Brad Norman tungod sa atake sa kasingkasing, kay sa among pundok nga migawas na sa relihiyusong kapunongan nga among gi-membrohan, hilabihan man gud niya ka-aktibo ug pagpakabana sa bisan unsang relihiyusong kalihukan, ilabi na gayud ang pagpaambit sa pulong sa Ginuo ngadto sa uban.

“Brad Norman, aniay pungpong sa lab-as nga mga bulak ug dinagkutang kandela alang kanimo ning unang kasaulogan sa adlaw sa mga kalag sukad sa imong pagtaliwan sa tunga-tungang bahin sa Septiyembre,” hinay ang akong tingog atubangan sa nitso ni Brad Norman.

Gidagkutan ni Luz amg mga kandela human ikapahiluna ang pungpong sa mga bulak atubangan sa nitso.. Naaninaw namo ni Luz ang daghang mga kandela nga nalanay na ug ang mga bulak nga dili na presko diha atubangan sa nitso ni Norman. Nasayod kami nga sa unang adlaw sa kalag-kalag nahiduaw na sila si Sis Letty uban sa ilang mga anak ni Norman nga sila si Senyang, Carl ug Ken.

Belib ko kang Brad Norman sa among panag-uban sa ‘couples cluster’. Gipamatud-an niya namong tanan sa grupo sa ‘couples’ nga dili gayud diay babag ang atong pagpakighiusa sa Ginuo, bisan dili mahisakop sa usa ka relihiyusong kapunongan. Si Brad Norman kanunay nagdasig sa among grupo sa kamahinungdanon sa pagpangumpisal matag bulan.

Hilom kong gisupak ang pasangil sa uban nga kuno ‘untimely death’ ang nahitabo kang Brad Norman. May lain pa nga midason nga kuno gahi og ulo si Brad Norman nga nagpasabot sa wala na niya pagbalik sa relihiyusong kapunongan, nga mao kunoy hinungdan sa sayong kamatayon ni Brad Norman.Pagka dakongsayop sa maong katarungan!

“Miabot na ang tagal sa kinabuhi ni Brad Norman. Ug kini moabot usab kanatong tanan sa di hibaw-ang oras ug panahon! Miuna lang siya kanato ug kita moapas usab kaniya!” pasabot ko sa tanan nga mihatod sa paglubong kang Brad Norman.

Atubangan sa nitso ni Brad Norman dungan ming militok si Luz og pipila ka pulong sa pag-ampo alang sa malinawong pagpahulay sa iyang kalag. Nahanaw man si Brad Norman sa among panan-aw, apan nagpabilin siyang buhi sa panumdoman namo sa grupo sa ‘couples’ hangtod sa kahangturan. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!