NALINGAW ko sa akong higala nga wa dayon makasabot sa akong gi-post pagka-Martes sa Facebook nga emoticon nga nagkatawa ug gitaliwad-an sa mga kamot nga nagpakpak, botelya sa red wine, exploding firework ug rocket nga nilupad.
Akong gipasabot nga puno sa kalipay ang akong kasingkasing nga ang akong baba ug mga tudlo maglisod pagpamahayag. Kini kay nidaug ang kadaghanan sa akong gidapigan sa lungsod sa Oslob.
Mga pahalipay!
•••
Usa ka higala sa Facebook namahayag nga nidaug si Lito Lapid pagka senador tungod sa papel niini sa FPJ’s Ang Probinsyano isip Pinuno sa Vendetta.
Nagpasabot ba kini nga ang papel ni Edu Manzano isip dautan nga pangulo sa nasud nga si Lucas Cabrera sa susamang teleserye maoy hinungdan nga napilde kini sa pagdagan isip kongresista sa San Juan?
Ka alegre ba!
•••
Naluoy ko ni Richard Yap nga nihulagway nga ‘disappointing’ ang kasinatian kay napilde sa iyang tinguha nga morepresentar unta sa Cebu City North District sa House of Representatives. Tingalig taas ra ang maong posisyon alang niya nga bagito pa.
Makadaug pa tingali unta siya kon konsehal ang gidaganan kay di lang usa ka pwesto ang naghulat.
•••
Samtang daghan ang naglinya og dugay adtong adlaw sa pinili-ay, ako ug akong higala nga si Pros Bomediano nihanoy ra gyud. Natingala ang ubang higala nako sa laing cluster nga mas una pang nilinya kay namo.
Unsaon nga didto man sa among cluster gibutang ang mga seniors mao nga wa mi magdugay. Pero kadtong natingala amo rang gitubag nga ‘PWD man gud mi.’
Di hinuon Persons With Disability ang among PWD kon dili Persons With Diskarte. O-ha! Anà!
•••
Sa pagsulat nako ani, ni-us-os ngadto sa ika-14 nga ranggo si Sen. Bong Revilla ug nakasulod si Sen. Bam Aquino sa Top 12.
Samtang daghan ang nituo nga ang pagsayaw og budots ni Bong sa iyang TV campaign ad maoy nakadani sa mga boto, duna say niingon nga ang budots ang hinungdan nga wa sila mobotar niini.
Bugalbugal ug di seryoso kuno ang dating. Anà!