Super Suroy: Tagay sa Brussels, Belgium

BRUSSELS, Belgium - Kung hilig ka’g beer o gustong matilawan ang nagkalain-laing klase sa beer ang Belgium maoy usa sa mga nasud sa Europa nga angay nimong bisitahon.

Gawas sa ilang lami-an nga waffles bisan anaa ra sa kilid-kilid ug chocolates, ang Brussels giila nga World’s Biggest Beer Selections gumikan sa kadaghang klase niini.

Nasayod ba mo nga gipanghambog sa maong nasud ang kapin sa 1,000 ka mga klase sa beer nga mahimo nimong matilawan dinhi?

Guinness World Record

Niadtong 2004, sila ang nibuak sa Guinness World Record nga adunay pinakadaghang klase sa beer nga gibaligya nga moabot ngadto sa 2,004!

Sa pagbisita sa Superbalita Cebu sa Brussels, capital city sa Belgium, nasuta ning mantalaan nga halos moabot ngadto sa 100 ka litro sa beer ang mahurot sa usa ka Belgian matag tuig sukad 1846 hangtod na niadtong 2013.

Base sa datos nga nakuha ning tigsuwat sa BELvue Museum sa pagbisita niini didto, moabot ngadto sa 73 litros sa beer ang nainom nga beer sa usa ka Belgian niadtong 2013.

Sa tuig 1906 natala ang pinakataas nga beer consumption sa usa ka lumolupyo nga niabot ngadto sa 236 ka litro sa maong tuig.

Gamay ra nga nasud ang Belgium apan di malilong nga kusog manginom og beer ang mga tawo dinhi. Sa atoa pa mga palahubog ning mga tawhana? Hahaha

Kuwang ra ang usa ka adlaw kon buot nimong mag-beer tasting sa tanang klase niini gumikan sa kadaghan, basin pa hinuon og masarasay ka sa imong paglakaw.

“Drink beer but choose well. And never order the same twice,” natala sa guide map nako gikan sa USE- IT Brussels.

Alcohol content

Angayang hinumduman ang alcohol volume sa ilang beer moabot hangtod sa 9 percent ug adunay usa ka brand nga 10 percent.

Pipila sa mga sikat nga klase mao ang nabantog nga Trappist Beer nga alang sa “late- evening talk” ug Pils beer nga angayan nimong orderon kon ikaw magparty.

Aduna say white beer ug “Kreik” laing klase, nga sagad nimong makit-an kon ting-init. Tilawi sab ang aslom nga Gueuze beer ug pangitaa ang mga pangan sama sa Cantillion, Girardin, ug Boon.

Ayaw sab sipyata ang pagbisita sa Delirium Café nga adunay kapin sa 2,000 ka klase sa Beer nga gi-serve sa maong bar.

Sa akong katapusang gabii sa Brussels, nipalit kog beer isip “warm-up” sa wa pa ko nisulod sa Delirium.

Mas tipid ug barato kon mopalit kag beer sa ilang supermarket kaysa mga bar, nahubog gyud ko pero nakauli pa hinuon ko. Hahaha

Laing suroyanan

Duawunon sa mga turista di lang ang capital city apan lakip na ang Ghent ug Bruges.

Gani, matuyok ra nimo sa usa o duha ka adlaw ang tanang tourist spots sa Brussels nga gilangkuban sa Royal Palace (Palais Royal), European Parliament, European Commission (sagad sa mga importanteng meeting sa mga nasud nga miyembro sa European Union pagahimuon sa Belgium), ang sikat nga mannequin piss, mga museum, mga cathedral ug shopping district dinhi.

Pahibalo sa mga turista

Sirado sagad mga museum basta Lunes ug ang mga restaurant kon Domingo sa Brussels. Mas maayo sab nga unli pass sa ilang train imong paliton kon ikaw mobisita sa mga tourist spots. (Dugang hulagway sa theculturetrip.com)