DAGHANG mga pulitiko nga maoy nagdumala sa ilang mga teritoryo sa dugay nang panahon ang wa damhang mangapildi. Ehemplo niini mao ang Cebu City nga gidumala ni Mayor Tomas Osmeña sa 30 ka tuig ang napildi ni Bise Mayor Edgardo Labella. Ang nahabilin sa mga pulitikong Osmeña mao nalang si Konsehal Renato “Junjun” Osmeña, Jr., pag-umangkon sa mayor nga natalay sa Barug PDP Laban. Napukan usab si kanhi senador ug Toledo City mayor John Henry “Sonny” Osmeña kang Pablo John Garcia sa pagka-kongresista sa ikatulong distrito, ingon man si senatorial candidate Sergio “Serge” Osmeña III.
Mao usab kini ang nahitabo sa mga Radaza nga naghupot sa Lapu-Lapu City sukad pa sa 2001. Si kanhi mayor ug kongresista Arturo “Boy” Radaza gipukan sa iyang kanhi bata-bata nga si Junard “Ahong” Chan pagka-mayor. Return bout na kini ni Radaza ug Chan. Ang kandidato usab sa pagka-bise mayor nga si Konsehal Harry Radaza ang gipildi ni Dr. Celsi Sitoy nga gikan sa silingang lungsod sa Cordova. Ang nahabilin nalang mao si kanhi mayor Paz Radaza nga midaug pagka-kongresista puli sa iyang anak nga si Aileen.
Sa ikalimang distrito, sa unang higayon gipildi sa usa ka bagito sa pulitika, nga si Liloan Vice Mayor Vincent Franco “Duke” Frasco si incumbent Congressman Ramon “Red” Durano VI nga anak ni Mayor Ramon “Nito” Duterte Durano III. Ang mga Durano maoy naghawak sa Danao sud sa 70 ka tuig. Kining maong mga mananaug gi-indorso ni Presidente Rodrigo Duterte. Daghang nagtuo nga daku kaayo og natabang ang pag-isa sa ilang kamot ni Digong. Ila kining gitawag nga “Digong magic.”
Sa Metro Manila nabungkag usab ang dinastiya sa mga gamhanang pulitiko. Si Manila Mayor Joseph “Erap” Estrada, nga kanhi presidente sa nasud, gipildi ni Francisco Domagoso nga naila sa screen name nga Isko Moreno. Si Domagoso kanhi Manila vice mayor ug kauban ni Estrada hangtud nga mihukom siya pagdagan pagka-mayor batok kang Erap. Gipildi siya ni Isko bisan sa iyang kaugalingong presinto. Apan dili kay sa Manila ra gipukan ang mga Estrada kondili hasta sa ilang balwarte sa San Juan. Ang apo ni Erap nga milansar pagka-mayor, si incumbent Vice Mayor Janella Ejercito gipildi ni Francis Zamora. Mao ni ang nakabugto sa 50 ka tuig nga pangagamhanan sa Estrada – Ejercito clan sa San Juan.
Sa Pasig City, wala makatuo ang katawhan nga mapukan sa usa ka batan-ong pulitiko nga si Victor Marie “Vico” Sotto, anak ni Vic Sotto ug Connie Reyes, si incumbent mayor Bobby Eusebio. Napildi usab ni Roman Romulo ang iyang igsuon nga si Kongresista Ricky Eusebio. Mao kini mitapus sa 29 ka tuig nga paghupot nila sa renda sa gobiyerno sa Pasig City. Bisan gani si kanhi bise presidente sa nasud Jejomar “Jojo” napildi man ni Even Peña. Ngano man? (mannyrabacal1144@gmail.com)