MAOY sumsuman sa mga pundok-pundok ang pagdaog ni Cebu City Vice Mayor Edgardo Labella isip mayor ug ang pagkaparot ni Cebu City Mayor Tomas Osmena sa eleksyon niadtong Lunes, Mayo 13. Ang sagad mga pangutana, unsay nakapadaog, unsay nakapildi?
Lab-as pa man gud kaayo. Pero mao man gyud nang eleksyon, dunay modaog, dunay mapildi. Apan sa pagligid-ligid sa panahon, hayan nga kini mahikalimtan lang, labi na kon dunay mga bag-ong isyu nga mas gikahinaman sa kadaghanan.
Ang Commission on Elections Board of Canvassers miproklamar kang Labella isip mayor-elect sa hapon sa Mayo 14, sa botos nga 265,436 batok sa kang Osmeña nga 246,399 botos. Si kanhi mayor Michael Rama napiling bise mayor sa botos nga 261,381 batok sa kang Mary Ann delos Santos nga 234,615 botos.
•••
Mohural sa katungdanan si Labella sa Hunyo 30. Unsa kahay mapaabot sa katawhan sa syudad? Unang pamahayag ni Labella mao nga libkason niya ang Executive Order no. 34 nga nagpa-impound sa mga sakyanan nga nag-counterflow sa 30 ka adlaw.
Wa nay impound. Apan duna gihapoy silot sama sa multa nga ipahamtang niadtong nag-counterflow subay sa Cebu City Traffic Code. Gihulagway ni Labella ang pag-impound og 30 ka adlaw nga anti-poor kun pagduot og samot sa mga kabos, labi pa kay daghan sa na-impound mga motorsiklong gigamit og habalhabal.
“That EO 34 is anti-poor and depriving the poor man of his income because if you impound the vehicles for 30 days, wala intawon siyay pangita. Ug labing maayo sundon ang balaod nga nalatid sa Traffic Code sa pagpahamtang og silot,” matod pa niya.
•••
Giklaro ni Labella nga wa kini magpasabot nga ihunong na sa pagpatuman sa Cebu City Transportation Office (CCTO) ang pagpanakop sa mga motorsiklo ug sakyanan nga mo-counterflow.
Delikado matod niya ang pagsugat sa lane sa karsada sa nagpadong nga mga sakyanan hinungdan nga angay kining ipatuman. “We will impose efficiently, effectively the law against counterflowing because it is a clear violation of law,” matod pa ni Labella.
Subay sa record sa CCTO niadtong Pebrero 2019, niabot na og 8,000 ang nadakpan sukad sa pagpatuman sa EO 34 niadtong Pebrero 2018. Niadtong Disyembre 2018, gipa-release ni Osmena ang mga motorsiklo ug mga 300 na lang ang nahibilin. Apan pildi man lang gihapon.