SECTIONS
Sunday, May 26, 2019
SUPERBALITA CEBU

Nalzaro: Nabuntog ug napukan

Saksi

KINSA ba ang magdahum nga mapukan ug mabuntog ang liderato sa Durano clan sa 5th district dinhi sa lalawigan sa Sugbo? Ang fifth congressional district gilangkuban sa mga lungsod sa Liloan, Compostela, Carmen, Sogod, Catmon, Borbon ug mga lungsod sa isla sa Camotes island, San Francisco, Poro, Tudela ug Pilar ug dakbayan sa Danao nga maoy balwarte sa mga Durano.

Sulod sa pito ka dekada o 70 years ang mga Durano mao na ang nagdumala sa pulitika sa fifth district labi pa sa Dakbayan sa Danao. Sukad pa kini sa ilang patriarch nga si Don Ramon Durano Sr., giilang political kingpin sa Danao niadtong mga dekada 50. Misamot ka lig-on ang ilang gahum niadtong panahon sa diktatoryang rehimen ni Marcos. Nahimong loyal nga supporter ang mga Durano ni Marcos.

Bisan sa pa man sa pagpalayas ni Marcos human sa Edsa People Power revolution niadtong 1986 ug sa pagsulod na sa pangagamhanan ni Cory Aquino, wala gihapon matandog ang liderato sa mga Durano sa fifth district ug dakbayan sa Danao. Nisunod sa tunob ni Nyor Amon mao ang usa sa iyang mga anak nga si Ramon “Nito” Durano III nga nahimong kongresista sulod sa pipila ka termino. Human ni Nito, nisunod ang iyang anak nga si Ace. Human makaserbisyo si Ace og pipila ka termino ug dihang natudlo isip Department of Tourism (DOT) secretary sa panahon ni Presidente Gloria Macapagal Arroyo, gihulipan siya sa iyang igsoon, Ramon “Red” Durano VI.

Nakaserbisyo na usab si Red og pipila ka termino hangtod nga nahitabo ang wala damha, sa bag-o lang natapus nga eleksiyon sa Mayo 13, gipilde siya ni kanhi Liloan mayor Duke Frasco. Dili bag-o sa pulitika si Duke kay misunod usab siya sa tunob sa iyang amahan nga si Dodong Dako Frasco nga dugay nga nakaserbisyo isip mayor sa Liloan. Pagkahuman sa termino ni Duke, gipulihan sa iyang asawa nga si Atty. Christina Codilla Garcia Frasco.

Wala na gyud kaha ganahi ang mga botante sa fifth district sa liderato sa mga Durano ug gusto na sila og kausaban? O gumikan ba kaha sa “Duterte magic” gumikan kay si Frasco ang gi-endorso ni Presidente Duterte? Tam-is kining nakab-ot nga kadaugan si Frasco kay inpluwensiyadong political clan ang iyang gibuntog ug gipukan. Makabalik pa kaha ang mga Durano sa sunod nga eleksiyon? (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!