SECTIONS
Sunday, May 26, 2019
SUPERBALITA CEBU

Editoryal: Balaud sa karsada

Editorial Cartoon by John Gilbert Manantan

DAGHAN ang nangalipay sa pagpahibawo ni Mayor-elect Edgar Labella nga iyang ipa-release ang nahabilin nga mga motorsiklo ug uban pang sakyanan nga nasikop ug na-impound tungod sa pag-counterflow.

Giklaro ni Labella nga wa nay impounding sa motorsiklo o bisan unsa nga sakyanan nga masakpan nga nag-counterflow. Apan padayon niyang ipatuman ang pagdili sa counterflow sa mga sakyanan.

Grabe kagubot ang karsada sa Sugbo tungod sa nagkadaghang mga sakyanan. Busa, ang disiplina sa karsada mao ang gikinahanglan aron makuhaan ang kalbaryo sa kadaghanan.

Kinsa may malipay nga motorista nga magtan-aw sa mga sakyanan nga mosugat sa dagan sa trapiko nga sagad moresulta sa pagkabara?

Di lang kay mao ni ang bati nga resulta sa counterflow. Pila na man ka mga disgrasya sa dalan bunga sa counterflow? Di ba daghan kaayo? Pila man ka mga kinabuhi ang nakalas tungod niini? Daghan.

Busa, di angay nga ikalipay kon ugaling ihunong ang kampanya sa counterflow. Mas makaayo kini kay sa makadaut sa kinabag-an. Mga badlungon ra ang malipay kon undangon ang kampanya batok sa counterflow.

Maayo pa man gani nga estriktuhon pa ang pagpatuman sa balaud sa trapiko, sama aning obstruction. Kanang pagpataka og park sa karsada sa bisan asa ug oras. Paghunong sa mga sakyanan bisan dunay no stopping sign ug uban pa.

Kinahanglan usab estriktuhon ang paghatag og pagtugot sa pagpaninda sa mga dapit nga agianan sa daghang mga sakyanan.

Hayan kon higpit nga ipatuman ang balaud sa trapiko, makabaton og gamay nga kahapsay ang kadalanan. Di na kinahanglan nga ipatuman ang polisiya nga wa na mahasubay unsay nalatid sa balaud. Makapaturok man tuod og kahadlok ang polisiya, apan moresulta usab sa kagutom sa uban, sama niadtong wa makapanginabuhi kay natanggong ang motorsiklo og usa ka buwan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!