MIPUGNIT og tagsa-tagsa ka luna alang sa semifinals round ang Lipata-Linao, Tubod ug Tunghaan sa nagpadayon nga Minglanilla Mayor’s Cup Summer League volleyball event girls category 17-under human kini mipukan sa ilang mga kaatbang niadtong Miyerkules sa volleyball court sa Minglanilla Sports Complex.
Unang miabante sa sunod round ang Tunghaan human kini mipildi sa Cuanos, 25,10, 25-16. Misunod usab gilayon ang Lipata-Linao pagbuntog sa Tungkop, 25-10, 22-25 ug 25-8 samtang gipatugbabawan usab sa Tubod ang Ward 4, 12-25, 25-15, 25-16.
Sa Boys category 17-under, mikulit usab og kadaugan ang Calajoan Spikers batok sa Pakigne, 27-25, 25-17. Ang Ward 4 nakaipsot usab sa pagpanghudlat sa Lipata, 24-26, 25-23, ug 25-19.
Sa kadaugan nakasiguro na usab og luna sa semifinals ang Calajoan, Ward 4 ug Tungkop.
Sa basketball, pabiling limpiyo ang baraha sa Pakigne (4-0) human nila gilubong ang Tungkil, 75-60, sa 17-under division.
Si Kurt Kobe Tura nangulo sa Pakigne nga may 13 puntos nga gidugangan og 11 ni Mark Gamutan. Way naka-double figure ang Tungkil nga igo lang nakakuha og nuebe puntos gikan ni Emmanuel Gallo ug otso puntos gikan ni Joshua Gonzales.
Sa Open division, girehistro sa Calajo-an 1 (1-3) ang ilang unang daog, 90-82, batok sa Cuanos (0-3) ni playing coach Ancing Companion.
Sa 21-under, yanong gikusokuso sa title-favorite Linao 1 ang Ward 2, 118-87.
Si Ryzel Gilbuena mihagdaw og 15 puntos aron pangulohan ang Linao , midugang og 13 si John Pio Ornopia ug 10 gikan ni Darwin Gabaca.
Sa napukan nga Ward 2, si RJ Quinio mipabuto og 30 puntos, ug 23 usab ang nahipos ni Cal Sillote. (JBM)