KATORSE anyos nga lalake nialegar nga gidagit siya gikan sa lalawigan sa Bohol ug nakaeskapo sa pag-abot sa pantalan dinhi sa dakbayan sa Sugbo ug nakadangop sa kapulisan sa iyang pagdinagan.

Dugang pa sa bata nga duna siyay nakit-ang laing bata sulod sa usa ka van nga gibaatan ang baba ug gigapos ang mga kamot.

For updates from around the country, follow Sun.Star on Twitter

Gisusi pa karon sa kapulisan sa dakbayan sa Sugbo, pinaagi sa pagpakig-alayon sa kapulisan sa Bohol, kon unsa ka tinuod ang alegasyon sa bata.

Si Toto (tinuod ngan gipugngan), tinun-an sa elementarya, taga Burgos st., Jetafe, Bohol mialigar nga pasado alas syete sa buntag niadtong Miyerkules naglakaw siya daplin sa dalan paingon na unta sa tunghaan.

Usa ka wa hiilhing lalake ang kalit lang niagbay kaniya ug nition kaniya og kutsilyo.

Gipugos siya sa pagdala sa merkado sa lungsod diin naghuwat ang usa ka babaye uban sa laing batang babaye.

Ninglukat sila og tiket sa barko dayon nanakay padung dinhi sa Sugbo.

Matod pa sa bata nga sa ilang pag-abot sa pantalan pasado alas 10 sa buntag niadtong Miyerkules, usa ka van ang naghuwat kanila daplin sa dalan.

Sa pag-abli sa van, iyang nakita ang lain pang mga bata nga ginapos ug binaatan ang baba.

Sa iyang kahadlok, dali niyang gisiko og kusog ang lalake nga nidala kaniya ug nidagan siya palayo sa lugar.

Dugang pa sa bata nga sa tanto niyang dagan, niabot siya sa Pier Uno ug nakita ang karatola nga pulis hinungdan nga dali siya nisulod sa Waterfront Police Station sa may Pier 1.

Nihimo og follow-up ang kapulisan, apan wa na nila maabti pa ang giingon nga van.

Si Chief Inspector Aureo Sanchez, hepe sa Waterfront Police, nitawag sa Jetafe police station ug nasubay ang pinuy-anan ug ginikanan.

Ang uyoan sa bata nga taga Lapu-lapu city mao nay nikuha niya gikan sa Waterfront police ug gikatakda nga dad-on pauli ang bata paingon sa Bohol.

Usa ka ginganlan og Adelino Torreon, 37, taga Ibo, siyudad sa Lapu-lapu, niangkon nga iyang pag-umangkon ang bata.

Siya nidugang nga gitawagan na lang siya sa iyang igsuon sa Bohol nga ipakuha ang iyang pag-umangkon sa Waterfront police pasado alas 8 sa gabii niadtong Miyerkules.

Gitugyan sa kapolisan ang bata ngadto kang Torreon ug nipasalig nga iyang dad-on sa Bohol kagahapon.

Si SPO3 Rene Cerna niingon nga subay sa ilang pakisusi sa Jetafe, Bohol, way gika-report nga may bata nga gidagit sa dapit.