ANG 75,000 ka qualified senior citizens makakuha sa ilang financial assistance gikan sa Cebu City Government karong Sabado, Mayo 18.
Si Flora Bartolome, officer-in-charge sa Department of Social Welfare and Services, niingon nga ang matag kwalipikadong senior citizen makadawat og P2,000 cash aid nga nagrepresentar sa ilang assistance alang sa mga buwan sa Abril ug Mayo.
Ang Siyudad wa makapanghatag sa financial assistance sa miaging buwan tungod sa ban sa pagpagawas sa public funds tungod sa eleksyon niadtong Mayo 13. Duna untay tinguha nga ipa-exempt kini.
Ang pagpang-apod-apod dungan nga ipahigayon sa mga barangay sugod sa alas 7 sa buntag, matod niya.
Si Bartolome niingon nga ang mo-claim sa ilang assistance kinahanglan magdala sa ilang identification (ID) card nga giisyu sa Office of the Senior Citizens Affairs (Osca).
Kadtong mapakyas sa pag-claim sa ilang cash aid atol sa distribution adto na makakuha niini sa City Hall.
Ang Siyudad naggahin og P12,000 nga financial matag kwalipikadong senior citizen matag tuig.
Sa Martes, Mayo 21, tanang kwalipikadong persons with disabilities (PWD) makadawat usab sa ilang financial assistance gikan sa Siyudad.
Ang distribution dungan usab nga himuon sa 80 ka mga barangay.
Matag PWD makakuha og P2,000 nga cash aid nga nagrepresentar sa duha ka mga buwan nga financial assistance gikan sa Siyudad. (RVC sa Sunstar Cebu )